February 21,2023; Vawiin Assembly Budget Session zawhna leh chhanna hunah footballer inhliam Miriam Lalnunsiami sawrkarin kanna sum a pek chungchangah sports minister Robert Romawia Royte leh Serchhip bialtu MLA Lalduhoma ten thu inchuh an nei a. Hemi chungchangah hian speakerin Assembly officer te chu Assembly proceedings vawiin ngei a enfel turin a hrilh a, thu diklo sawi zawkin ngaihdam an dil tur thu a sawi.

Vawiin rorel inkhawm zawhna leh chhanna hunah Sports minister chuan member te zawhna leh zawhbelhna te chhangin footballer, National Games a inhliam Miriam Lalnunsiami chu Mizoram Olympic Association atangin Rs. 10,000 leh leh MFA kaltlangin December ni 15, 2022 ah Rs. 25,000 a kan a ni tih a sawi.

Hemi chungchangah hian Lalduhoma chuan Miriami bill pe vek angin Minister in hmanni ah a sawi tih tarlangin, "A tirah Rs. 10,000 pek a ni a, a hnuah MFA ten Sports Council atanga hmuh leh turin Rs. 25,000 an khawnkhawm a an pe a, a bill chu Rs. 60,000 chuang a ni. A thian ten Rs. 40,000 chuang an thawhkhawm a, Jeje-a phone atangin gpay-in Miriami account ah an thun a, hei hi sawrkar tum sak anga sawi talh tur a ni lo," a ti.

Sports minister chuan Miriami chungchang sawi a la nei lo tih tarlang thungin, "Serchhip bialtu MLA in Miriami bill pe vek tih sawi anga min puhna hi nawhreh tlak a ni. Miriami chungchang kamkhat mahin ka la sawi lo a...ka chhang lo," a ti bawk.

Hemi chungchangah hian thu inchuh awmzuiin, Speaker Lalrinliana Sailo chuan house proceedings en a nih tur thu leh thu dik lo sawi zawkin ngaihdam an dil a ngaih tur thu a sawi a. Officer te chu vawiin ngei a proceedings en fel hman turin a hriattir nghal bawk.