ZALEN October 16, 2024 : Vawiin khan Congress party chuan Sinlung Hills Council inthlan lo awm tur atan 'Campaign Kickoff Programe' Sakawrdai YMA Hall-ah an hmang a, he hun hmanpuitu MPCC President Lal Thanzara chuan Congress-in hnehna an chang a nih chuan HPC (D) nena inremna an siam angin hma an lak tur thu a sawi.

Lal Thanzara chuan, "Vawiinah hian Sinlung Council huam chhunga mipuite hriat tura ka sawi duh chu, he inthlanah hian Congress party in hnehna kan chan chuan Congress party leh HPC (D) nena kan inremna angin Sakawrdai ah ngei hian headquarters kan bunin hma an la dawn a ni tih ka sawi duh a ni. Sinlung Hills Council-ah hian Congress-in sawrkar kan siam anih chuan kan fund neih ang te kan hmang tangkai dawn a ni. Sawkawrdai leh a chhehvel khuate hian pawisa lengvak velin nitin khawsak pawh a tihziaawm kan beisei a ni," a ti.

"Ram buai hrehawm zia hre lo thangthar zawk te chuan remna leh muanna hlut zia hi an hre lo. HPC (D) nena inremna te hi Congress sawrkar hmalakna a ni. MNF khan an sawrlar lai khan HPC(D) te pawh khan inbiakna pawh an nei a, mahse Pathian malsawm tlak a ni lo nge, a hlawhtlinna hmel hmuhtur a awm lo a ni. Amaherawh chu Congress sawrkar khan remna leh muanna a ngai pawimawh a, theihtawp a chhuahna azarah inremna kha a lo awm thei a ni," a ti bawk.

"Chutih laiin ZPM hotute chuan kum 30 dawn lai sawrkarna lo chang tawh Congress te engmah ti lo anga an sawi te hian thangthar thil hre pha lo te ngaihtuahna a ti buai a. Mizorama hmasawnna hnathawh za a sawmkua hi Lal Thanhawla kaihhruai Congress sawrkar hnathawh a ni."

"Mizorama Hydel Project 12 zinga 9 hi congress kutchhuak a ni a, PC hun laiin pahnih siam a ni a, MNF hun laiin Serlui B chiah siam a ni bawk. Tuirial te hi an sum duh vanga an tih tawp tawh kha Congress chuan hman theih in kan siam tha leh a ni. Tuna sawrkarin Tuivai Hydel Project a din tawh pawh Congress sawrkar laia kan lo ruahman tawh leh sum pawh awm sa a ni," a ti.

ZPM chungchang sawiin, "ZPM hi mipuiin an enchhin mek lai hian Central-ah pawh an thurualpui leh an kungpui MLA pahnih nei BJP hian an enchhin ve mek a a, BJP MLA te dinhmun leh chanvo hi engtin nge an chinfel dawn an thlir mek a ni."

"Nimin khan helai hmunah kan Chief Minister chuan 'Mi rinawm lo zui hi in bat niin a lang lo' a ti a, a dik khawp mai. Vawiin ni ah hian zui tlak loh leh zui ngam loh an sawi dawn anih chuan ZPM hi an tiavai mai ang tih ka hlau a ni," a ti.