Aizawl: Nimin zing dar 9 vel khan Mizoram Legislative Assembly hnuaia Committee peng pakhat Assurance Committee member MLA pathum RL Pianmawia, Lalthanliana leh Vanlalawmpuii Chawngthu te chu Tuiruang lui bul, Tinghmun leh Zokhawthiang inkarah HPC(D) nia hriat ten silai hmangin an lo lambun a, mi 3 thiin hliam 6 an awm bawk. Zalen thudawn danin MLA 3 te hi Sub Centre endik tura kal an ni a, Tuiruang lui kamah hian HPC(D) nia hriatte hian lo kapin anmahni vengtu Sakawrdai OC, SI Zoramthara Khawlhring, Driver Lalchuailova MRP leh Hmangaihmawia MAP te chu a hmunah an thi nghal a, Zarzoliana MPS, SDPO Sakawrdai, Hav.Vanthuama, Constable Lalhmangaiha, Constable Lalkhawngaiha, Lalchhuanawma Driver leh Zohmingthanga ten hliam an tuar bawk. Hliamte hi nimin tlai khan helicopter hmangin Aizawlah phurh thlen an ni a, thite hi motor hmanga Aizawl panpui niin vawiin zing dar 8 hian sawrkar chawimawi-na famkim nen 1st Bn. MAP hmunpui, Armed Vengah vui an ni ang. Mizoram sawrkar chuan thu-chhuah siamin Assembly Assurances Committee member, ram hmasawnna atana ruahmanna en tura kal HPC (D) nia hriatten an lo lambun a, anmahni vengtu Police 3 lai kaphluma mi 6 lai an hliam chu a dem tak zet a. Sawrkarin inbe rem tura theihtawpa hma a lak laia hetianga tharum thawh a ni hi a demawm chauh ni lovin, a huatthlala tak zet a. Mizoram rorelna sang ber Assembly Session hnuhnung berah “Zofate inpumkhatna daltu chu engmah tih ni lo rawh se” tih lungrual taka pass a nih laia hetiang tualthahna kan ram chhung ngeiah a thleng hi pawi a ti tak zet a, pawi khawi-tute hi Mizote leh Mizoram hmelmate an ni a, sorkarin a dim lo vang, a ti. Mitthi chhungte sorkarin a tuarpui tak zet tih sawiin zangnadawnna pangngai bakah chhawmdawlna awm thei ang ang sorkarin a ngaihtuahsak dawn tih a sawi a. Hliam tuarte pawh an that leh thuai a beisei a, hliamte inenkawlna tur pawh sorkarin a ngaihtuahsak zel tih sawrkar thuchhuah chuan a sawi bawk. INKAP HLUM- ENGNGE AN SAWI Nimin thilthleng chungchangah hian University zirlai pakhat chuan, "Tharum hian engmah a sawifel theih loh a, chu a chhapah hmeichhe MLA kan neih chhun pawh an thliarlo hi chu HPC ka dem khawp mai," a ti. Aizawl chhimlama cheng dawrkai pakhat chuan HPC leh sawrkar inkar politics chu a nin thu sawiin tun tum chu sawrkar thiamloh a ni tiin, "Sawrkarin a inhrosak khum lutuk a, chumi rah chu ni ah ka ngai a ni," a ti a. Sawrkar a chet loh chuan mipuiin an dem a rin thu a sawi bawk. Congress Thalai (MPYCC) pawhin Assembly Assuarance Committee te chunga thilthleng chu an dem tak zet tih an sawi a.Remna leh muanna hnuaia Mizoram sawrkarin chak taka hmasawnna a kalpui mek tihbuai tuma silai nena MLA te lambun an ni hi hmasawnna kallai tihthuanawp duhna leh remna leh muanna tihchhiat duhnaah MPYCC chuan a ngai a ni, an ti bawk.