ZALEN May 14, 2026: Hmar People Convention (HPC), General Headquarters Sakawrdai President Lalroseim chuan 1994-a Mizoram sawrkar nen inremna an siam angin an dinna ngaiah an la ding reng a, Sixth Scheduled an hmuh theihna turin hma an la zel a ti a. Manipur Hmar Inpui Mizoram Region inti te chu HPC chungchangah inrawlh rem an tih loh thu a sawi.

Aizawl Press Club-a chanchinthar lakhawmtute an kawmnaah Lalroseim chuan, Manipur Hmar Inpui Mizoram Region inti te chu pawl phuahchawp registered pawh ni lo, an hruaitute pawh Mizoram mi dik tak pawh ni lo, Mizo tawng pawh thiam tha lo, an mimal hamthatna zawng an ni a, Hmar hnam tan tangkaina pawh an nei lo, an ram Manipur-ah politics khel rawh se. Manipur Hmar Inpui Mizoram Region inti te hi Hmar Peoples' Convention (HPC) chungchanga an inrawlh kan remti lo, a ti.

Lalroseim chuan HPC chu Sixth Scheduled-a awm an duh avanga ramhnuaia lut an nih angin Sixth Scheduled an hmuh theihna turin hma an la chhunzawm zel a ti a, chawl thei an nih loh thu leh HPC din chhan ber chu Hmar hnam tan sawrkarah Sixth Scheduled neih a nih a ti. 1994-a Mizoram sawrkar leh HPC ten inremna an ziah angin Hmar School Primary level hawnna tur khaw 24-ah an dil mek a ti a, Hmar Art and Culture pawh tih pui tlin a nih theih nan sawrkarah hma an la mek tih a sawi bawk.

HPC hruaitu chuan tunah hian Ramfangzaua (Fana) Sakawrdai leh Lalparkunga, Sakawrdai te chuan HPC (R) pawl phuahchawp an din niin a sawi a, anni hi mi rinawm lo tak an ni a, Hmar People Convention hminga thil an tih an rem tih loh thu a sawi tel.