ZALEN, Mar. 25, 2025: Lungleiin a vawi khat nan professional boxing a thleng dawn a, Pukpuiah WBC Youth champion Laldinsanga leh Filipino fighter Orlie Rojas Silvestre an inhnek ang.

April 24 leh 25 hian K Liantluanga Indoor, Pukpuiah HPC Lunglei Fight Night buatsaih a ni dawn a, a pianna leh sei lenna Leitlangpuiah Dinsanga’n pro boxing a khelh hmasak ber tur a ni a, amah aia tawn hriat nei zawk nen an intawng dawn.

Kum 22 mi, Dinsanga’n 2022 LPS Pro Fight atangin professional a luhchilh a, vawi 10 a inhnek tawhah chak vekin khawvel huap boxrec rating bantamweight-ah 72-na a ni mek a. World title chuh a tumna kawngah a dinhmun chawi kan zel a tum a, kum 30 mi, Filipino a hneh a nih chuan hmun sang zawkah a inhung thei dawn a ni.

A hmaa ding tur, Silvestre hian 2012 atangin pro boxing a khel tawh a, vawi 30 inhnek tawhin tum 18 a chak a, vawi 10 tlawmin mi pahnih nen an inhnehtawk.

Ramthar Lunglei tlangval, Dinsanga tan fiahna pawimawh tak a ni nghal dawn a, Mizo leh Indian dang bakah Thai leh Ghanaian fighter a hneh tawh a, Filipino boxer a hmachhawn vawi khatna tur a ni. 

LPS Pro Fight middleweight champion F Lalthanliana Jr chuan a chenna, Lungleiah professional boxing a khelh vawi khatna tur a ni dawn bawk a, lightheavy huanga khel thin Yuvraj Singh nen an inhnek ang.

Electric Veng, Lunglei boxer Thanliana hian 2023 Pro Fight middleweight title fight-ah pro boxing a luh chilh a, C Lalhruaitluanga a hneh lo va. Hei hi professional huanga a inhnek awm chhun a ni mek a, chutih laiin nikum Pro Fight title fight-ah Hruaia laka a tlawmna chhang letin champion kawnghren a chhuhsak ve thung.

A hmaa ding tur Indian boxer Yuvraj hian professional boxing vawi nga khel tawhin tum li a chak a, Thanliana tan chona tling dawn a, a hneh a nih chuan pro boxing a khelh tum hnihnaah a vawi khat nan a chak dawn a ni.

HPC Lunglei Fight Night-ah hian Mizo leh hnam dang boxer eng emaw zat inlan tur zingah WBC India champion Vanlalawmpuia a tel a; professional boxing vawi hnih a khelh tawha chak ve ve, Omega Lalramdina leh amah aia tawn hriat ngah zawk, Vinod Ventedu an inhnek bawk ang.