American hrang hlui zaithiam Tony Bennett chu July 21, 2023, Zirtawpni khan a thi. Kum 96 mi thih chhan hi Alzheimer a ni a, a chenna New York City-ah a boral a ni. Alzheimer a nei tih hi kum 2016 khan hriat chhuah a ni a, a kum a upa ve tawh bawk nen harsatna a tawk chho zui a ni.

New York pop & jazz singer lar thih thu hian khawvel a deng chhuak rang hle a, uitu pawh a ngah hle. Media lian hrang hrangin a chanchin an tarlang a, a sulhnu ropui zia an sawi chamchi a ni. 

Bennett hian hla thahnem tak a tichhuak a, chung zingah chuan - The Way You Look Tonight, Body and Soul leh I Left My Heart In San Francisco te chu a lar zual an ni. American singer Lady Gaga chuan Tony Bennett hi a fak hle a, an lo zai dun tawh nghe nghe. 
Tony Bennett hian rimawi khawvelah hun a hmang rei hle a, a dam chhung hun tam zawk chu he lamah hian a insawrbing a tih theih. Album copy maktaduai tam tak a hralh chhuak a, Grammy Award pawh 20 zet a dawng hem mai - chung zingah chuan lifetime achievement award pawh a tel.

A lo zaipui tawh thin Elton John pawhin Tony Bennett hi a ui hle a, amah thlahna thu social media lamah a tarlang a ni. Elton John bakah hian singer Paul Young, 'Star Trek' actor George Takei, musician Nile Rogers leh US first lady hlui Hillary Clinton te pawhin Bennett uina thu hi an sawi chhuak bawk.