ZALEN August 11, 2026: Mizo historian B. Lalthangliana chuan Mizo history leh thu leh hla a zirna kawng hrang hranga lehkhabu leh thil hlui a lo lakkhawmte chu vawiin khan Government Hrangbana College kutah a hlan a, heng thil hlui dahkhawmna inhlanna leh hawnna hun hi College Library, Archive Room ah hman a ni.

Hrangbana College-a kum 24 chuang lo thawk tawh leh he college-a a thawh chhunga Mizo thu leh hla tih hausak leh tih hmasawn nana sulhnu ropui tak hnutchhiahtu B. Lalthangliana chuan Mizo history zir chiang tura bul a tan dan te sawiin, thu leh hla leh culture nena inzawm thil hlui leh thil hlu a lo lâk khawmte chu uluk zawka vawn that a nih zel theih nan Hrangbana College Archive hnenah phal takin a pe tih a sawi.

Hrangbana College-a a thawh chhunga Principal te leh a thawhpuite'n an phûrpui thin avanga sulhnu nei ve thei a ni chu vannei a intihzia leh lawmawm a tihzia a sawi bawk. Heng thil hlui pawimawhte inhlanna lehkha hi Pi H. Lalthanpuii, Associate Professor leh Archive Comt. Chairman ni bawk hnenah a hlan a ni.

MAL Book of the Year chawimawina tum hnih lai lo dawng tawh B. Lalthangliana pual corner-ah hian Mizo tawng, Kâwl tawng leh Sâp tawng thlenga inziak Mizote tana document pawimawh tling thei tur, tun huna hmuh tur leh lei tur pawh awm tawh lo lehkhabu hlu tak tak bakah a lehkhabu kut ngeia a ziah eng emaw zat dah a ni a. A tul ang zela tih len tura ruahman a ni bawk. Heng document-te hi History, Culture leh Literature huanga research tite tana hmanraw tangkai thei tur a nih angin, Hrangbana College zirlaite leh thawktute bakah, a duh apiang tan hman tangkai theih a ni ang.

He hunah hian B. Lalthangliana te nupa bakah Principal, Vice Principal, Mizo Department zirtirtute leh zirlai thenkhatte an tel a ni.