Indian maktaduai tel chuan Zirtawpni khan  an kût ropui ber pakhat, rawng kûtpui, Holi chu Covid-19 lengin ziaawm lam a pan mek zel laiin an lawm.

Nikumah khan Holi lawm hun lai hi hripui len nasat lai niin inkhuahkhirhna tam tak karah an lawm a ni.

Holi hi lunar thlaa thla bial zan tawp bera lawm thin a ni a. A lawmtute hian hlim takin, rawng lar lampang inbel leh inthehin, hlimna lam nen an lawm thin a. Thil bul tan thar lehna entirna chi khat a ni.

A lawm nan hian ruai an theh a, lâmin hun hlimawm tak an hmang thin bawk.

Mi thenkhat chuan pangpar (petal) rawng lar tak takte chu lu atangin induhsakna entir nan an intheh thin bawk a. A hma ni zanah hian kawtah mei lian takin an chhep êng a, hei hi thain sual a hnehna entir nan an hmang thin.

Kuminah hian Holi lawmna hi a nawlpuiin India ramah hri avanga inkhuahkhirhna awm tawh lovin a lawmtute hian an hmang thei a. Khawlaiah kût lawm hian mi tam tak an pung khawm leh thei tawh a ni.

Nikum kha chuan state tam zawk, khawpui ber Delhi pawh huamin, Covid kai an pun chak em avangin Holi lawma pun khawm khap a ni a. Tunah erawh hri hian ziaawm lam panin chawlhkar eng emaw ti chhung chu ram puma hri kai hmuh pawh ni khata mi 2,500 vel chauh a ni tawh a, ram pum deuhthawah inkhuahkhirhna hlih tawh a ni.

Sakhaw lama lawmtute pawhin nilengin Holi lawmna hun hi an hmang a. Thlalak thehdarhah chuan mipui pungkhawmte chu rawng lar tak taka inthuamin an sahawk nasa hle tih a lang.

Holi lawmnaah hian hri leng avanga inkhuahkhirhna mumal awm tawh lo mah se sorkar leh mi thiamte erawh chuan hlauhthawn lian tak a la nei.

Union health ministry chuan Ningani khan state tin hnenah lehkha thawnin tun hnaia China, Singapore leh Europe ram thenkhata a kai an pung leh tih hrilhin fimkhur turin a chah.