ZALEN September 22, 2024 : Mizoramah chawhrualin thla khatah vawksa kg. 4,07,145 (Rs. Vbc. 16.28 vel man) ei ral anga chhinchhiah a ni a. Hetihlai hian Mizoram Pig Farmers’ Association hruaitute chuan vawk hri leng vangin vawksaah Mizoram a la intodelh thei lo niin ZALEN an hrilh.

Integrated Sample Survey Report, 2023, AH&Vety department-a a lan danin Mizorama thla khat chhunga vawksa ei ral kg 4,07,145 hi kg 1, Rs. 400 hisapin Rs. 16,28,58,000 man a tling.

ZALEN zawhna chhangin Mizoram Pig Farmers’ Association hruaitute chuan tun dinhmunah vawksa-ah Mizoram a la intodelh lo niin an sawi a, a chhan pui ber pawh vawk hri leng vang a ni tih an sawi.

Vawk hri hi leng thin lo se la chuan state pawna thawn chhuah theih tur khawpin vawk vulh an intihhmuh tawh niin an sawi a, a vulh dan leh firm siam kawngah pawh hmasawnna a thleng nasa hle tawh niin an sawi bawk.

Hetihlai hian tun hnai kum 10 chhung velin Mizoramah vawk natna hri a leng nasa hle a, kum 2013-ah PRRS a len avangin tam tak an thi a, hemi hnu kum 2016, 2018-ah PRRS vang bawkin vawk tam tak an thi leh bawk.

Kum 2021 leh 2022-ah vawk hri tho, African Swine Fever (ASF) vangin Mizoramah vawk tam tak an thi leh a. ASF vang hian kumin ringawtah pawh vawk sing thum dawn an thi leh tawh a, chumi vanga sum hloh pawh Rs. Vbc. 250 vel a tling leh tawh bawk.