Kum 2000 kum khan mobile phone ka khawih tawh a, chu pawh chu rit deuh bel bul hi a ni a, tunah chuan smart tak tak a tam ta.  Mark Zuckerberg khan Feb. 4, 2004-a Facebook a tlangzarh khan hetiang em ema Mizo thalaiten kan luhchilh hlawm ang tih hi a suangtuah phak hi ka ring meuh lo a ni. Chutih laiin keini lah chuan kawng hrang hrangah kan lo hmang tangkai chu a ni bawk si a. Kan hman tangkai dan hrang hrang sawi tur a tam rualin kan chhiatpui dan pawh sawi tur a tam thei bawk ang. Facebook pian atanga kum 5-na, Feb. 4, 2009-ah WhatsApp-in khawvel êng a rawn hmu ve leh tan a, Fb aiin kan hmang tangkai lehzual a, Fb aiin kan hnaih zawk a, thlalak leh video inthawn a lo awlsam zawk em em a, Chanchinbu mite tan phei chuan a tangkai lehzual. Hmun hla tak taka awmte nen pawh kan inhnaih leh zual sawt a, video call a la theih zel avang hian ram hran hrana mite nen pawh hmaichhana inbia ang maia kan lo inbe thei ta hi thil lawmawm tak a ni. Kum 2009 vel khan ka thianpa hian minute 40 vel phone a hmang a, hmang rei hi ka ti khawp a, “Eng em em nge in sawi a?” ka ti hial a; nimahsela, keimah ngei pawh chuan darkar chuang, darkar chuang mai ni loin tlaivar varte chuan phone ka han hmang ve ta fo mai a, eng nge kan sawi chiam pawh tun hnua ka ngaihtuah leh pawh hian ka hre tawh chuang lo. Facebook lamah pawh hming hriat lar khawpin ka active bawk a, fiamthu ka thawh a, mi dang khei zawngin ka ngaihdan ka tarlang fo bawk a, a chang leh ka lunglen thu ka vawrh darh chiam thin bawk a, ka lungngaih thu leh ka thinrim thu thlengin ka pho chhuak thin. Ka tan chuan Facebook leh WhatsApp te chu hmangraw tangkai tak ang mai a ni. Nimahsela, chutianga social media ka hman tangkaina chuan keimah tak chuan hlawkpuina ka neih chiam pawh ka hre lem lo a, ka hlawkpuina lah chu a tha lam ai mahin a chhe lamah a ni fo mai a, hun tam tak min laksak a, zan rei tak tak thlengin ka meng a, massage pakhat lek vangin ka lungngaiin ka lawm ta mai thin bawk bakah cell phone tel loa nun har ka ti tlat mai a, mit a tikhamin ngaihtuahna tha lo tam tak ka neih phah ta hial bawk a, ka nun a tidanglam ta hle mai. A chang phei chuan bengvar bera tante ka han tum bawk a, bengvar lutuk pawh mi thenkhatte tan phei chuan a lo huatthlala leh thin bawk a. Chutianga keimaha thuk tak maia hmun a changa min hneh takah chuan dikin ka hre lo a, tha ka ti hek lo a, Facebook leh WhatsApp khawih loa awm thei lo hiala ka inngai chu ka duh lo a, tlem lai khan ni thum lai hi biakpawh theih miah loh turin ka off vek a, ka khua chu a har ngei mai a; nimahsela, keimah hna mai bakah mut dawnah pawh lehkhabu chhiarna hun thawl ka neih phain min chimtu boruak dang ka nei lo chu kawng lehlamah chuan ka hahdam phah viau mai a, ngaihtuahna fim tak hmangin duh zawng zawngin lehkha ka ziak thei bawk a, mi ka biak duh leh an inah ka kal mai a, dik tak chuan phone atanga inbiak aiin hmaichhan ngeia inbiak chu a lo hlu daih zawk mai bawk a, kawng tam takin ka hlawk phah a, tun thleng hian off zauh zauh chang ka nei ta fo mai. Amaherawhchu, chutianga inbiakpawhna zawng zawng off vek ngawt chu a rem lohna chen a awm a, keiin thei ngawt pawh ni ila eizawnna lamah loh theih loha phone call leh WhatsApp hman a ngaihna hun a lo awm a, thianten min hau a, “A nia lawm,” tiin ni thum hnuah chuan ka tinung leh ta zawk a. Nimahsela, keimah lam chu ka inthunun thei a, WhatsApp a group 60 chuanga regular taka awm reng chungin pawimawh tih bik group 20 vel chauh chu ka en thin a, a dangte chu hun thawl neih hunah ka bih ta chauh zawk a, a chang phei chuan ni eng emaw zat bih lohte pawh ka nei tho bawk. Hetiang hian tunlai khawvela mi tam takte chu social media hian min chim buai mek ni ve pawha hriatna ka nei a, a thente lah chuan bengvar nih duhin thil eng eng emaw te hi an tarlang thuai thuai ve thin bawk a, a thenin rilru zawng zawng phawrhna hmun atan an hmang ve bawk a, hmeichhe thenkhatte phei chuan Pathianthu tawite ziak pahin an hmel an tarlang bawk a, a tha vek tho e. Kan hman tangkai dan erawh a inang vek lem lo hi kawng lehlamah chuan a nuam ang reng ngawt mai. A pawimawh berah zawk chuan heng zawng zawngte hian keimahniah hlawkna min pek lem loh chuan a chin tawk hria ila, kan hun hlu tam tak min laksak theih avangin a tel loa awm theih tum ila, loh theih loha khawih a ngai a nih pawhin mi dang mitmei veng pah thin bawk ila ka duh ngawt mai. He HRINGNUN hlu tak leh hlimawm tak hi hetiang mai maia hman ral nan chuan a uihawm lu hrat chu a ni…