Kristian rama cheng kan ni a, Pathian nung bia leh ringtu kan ni. Naupan tet atanga Biak Ina inkhawm ziah thin kan ni a, thenkhatte phei chu ni tin chhung inkhawm nei thin pawh kan ni. Hetiang bakah pawh hian kan Kristianna chu kan zahpui lo hle bawk a, Kawngka lu chungah nen lam kan tar a, inchhungah pawh Pathian thu lam hawi thahnem tak kan la tar bawk thin.
Vantlang nunah pawh Kristianna hi kan dah pawimawhin kan dah sang em em bawk a, eng thil emaw function-naa tawngtaina hmanga bultan a nih loh chuan kim lo tlata hriatna pawh kan nei a ni ang, bultanna atan tawngtaina hmang tur kan sawm thin a, a chang phei chuan hun tawp kharna atan Lal tawngtaina kan la sawi rual leh thin bawk. Chhungril nun chu tumah inhre tak tak lo mah ila, pawn lam hmuh atan pawh thil mawi tak a ni hrim hrim a, a lian ber atanga a tê ber thlenga thuawih taka kan zavaia awmtheihna kawng khat a lo ni bawk nen a lawmawmin a ropui hle mai. Chin zel tlak a ni a, zawngchhang tlak pawh a ni.
Pathianni chawhma leh chawhnu leh zan thlengin Biak Inah kan inkhawm a, heng bakah hian Thawhtanni zan inkhawm a la awm a, Thawhlehni zan inkhawm a awm leh a, Nilaini zan inkhawm a awm leh bawk a, Inrinni zan inkhawm a la awm leh cheu bawk a ni. Kar khatah hian zan hnih emaw chauh inkhawm a awm lo a, hunawl awm a ni. Inkhawm loh zanah Kohhran hnatlang a awm phei chuan Kohhranah ka rkhat zan zawng zawng hun kan hmang tihna a ni ang. Hetia ka sawi chiam avang hian Kohhran rawngbawlna lam hi ka fak ar-ek lam a ni lo a, ka fak tak tak a ni.
Hetiang a nih lai hian kan Kristian percent a pung lo a a hniam zawnga a kal hi engvang nge? Kan rama suahsualna chi hrang hrang pung hi engvang nge? tih ang zawhna hrang hrang la awm theite hi chhanna mumal awm thei sela he kan chenna ram zim têah hian Krista zuitute hian tih tur pawimawh tak hlamchhiah kan neih hi a hriat theih maiin ka ring a ni. Khaw hrang hrangah hian hmun lailiah Biak In a awm deuh vek a, dik tak chuan motor luh hleihtheih lohna khuaah te pawh hian Biak In chu a chengate phu lohin a lian tlangpui vek a ni. Hei hian kan Kristianna hian hmun pawimawh leh chungnung a chang tih a hriata thil lawmawm tak chu a ni ngei mai. Nimahsela, hei hi a tawk mai lo a, mi tam zawkah te hi chuan tih tur kan la ngah tih a lang reng mai.
Engvangin nge Mizote kristianna hian thanlen lam a pan theih loh a, kan chhehvel leh kan kianga awmte atang pawh hian kan kristianna hian hna a thawk vak lo em ni? tih turin min ngaina vak lo chu a ni si a! Hetiang kan nih reng chuan kan Mizo Kristianna hian rawih lam a pan thei mai ang. Bengsika ngaihtuahna hman a ngai a ni. Mi mal mawhphurhna a ni a, chhungkaw mawhphurhna a ni bawk a, thenawm khawvengte nena tanrual a ngaihna lai a ni bawk a, ram hruaitute pawhin an vei a ngai a ni.
Hetianga Sakhuana lam ka han sawi tak vakna chhan chu mihring nun hian sakhuana tel lo chuan hlutna a nei lo a, sakhuana awm loin awmzia a awm loh vang a ni. Sakhaw rawngbawltu kan ni vek thei lo ang; nimahsela, sakhaw tana mi tangkai kan nih vek theih avangin kan ram leh hnam tan mi mal tin hian kan theihna kan hman a ngai a, a ngai mai ni loin a tul em em zawk a ni. Chutah chuan ralmuanna a awm a, zalenna a awm bawk a ni. Sakhuana avangin mi kan ang thei a, zirna sanga kal kher lo te pawh sakhuana avangin mi chungnungah an awm theih phah bawk a, kawng engkimah sakhuana hi a pawimawh a ni. Hei vang hian hlamchhiah theih a ni lo a, hnualsuat theih lah a ni hek lo.
‘It’s My Life’ tia zalen taka nun kan hman lai hian thenkhatte hi chu inchhirnain min umzui nghal fo bawk a, rah tha lo tak a thleng thin bawk a ni. Hetiang hi a pawi thin ngawt mai. Thalai kan nih avanga zalen taka nun hmang tur chu kan ni ngei a; nimahsela, inchhirna a thlen lohna atan fimkhur taka kan hman a ngai a ni. Chumi tur chuan kan mimal nun theuhah sakhuana dah pawimawh ila, sakhuana vawng nung chungin zalen taka nun hman tum ta zawk ila rah tha a chhuak ngei ang. Nula tlangval kan inngaizawng a, kan inhmangaih avanga sex hman kan tum tlat te, zu leh sa te pawh hlimna thlentu atana hman kan tum tlatte hian kan mi mal nunah chhiatna min thlen zawk fo a, beidawnna khuarkhurum mawng nei lo ah min hnuklut ta thin a ni.
Sex hi Pathianin nupa tana a duan a ni a, hmeichhiain mipa hnena a thilpek hlu ber a nih ang leh mipa tan pawh a tihtheihna sang ber a hlanna a nih bawk avangin khawvel awmchhung hian sex hi a pawimawh reng fo ang. Nimahsela, a ni lo zawnga kan hman nasat avang hian sex sawi hi kan tim deuh ta tlat a, Kohhran rawngbawltu tan phei chuan inhmeh lo a nih mai bakah fiamthu pawha sawi nuam a ni lo. Nula leh tlangval inhmangaih te tana duan a ni loa nupa tan chauha Khuanu duan a nih avang hian sex hi nupa karah a aia hlu a awm ngai lo ang. Billy Graham chuan hetiang hian nula hnenah a chah a, “I nulat thianghlimna kha i hmangaihna ringhleltu tlangval hnenah chuan hralh lul suh la, hmangaihna a ngheh zawk nan titu che hnenah pawh chuan a thlawnin pe hek suh. I hmangaih hnenah pawh chuan pe mai lo la, i pasal tan chauh ni sela, i pasal hnenah, a khumlaizawl i thlen hunah, chutah ngei chuan i thianghlimna chu zah takin i hlan dawn nia,” tiin.