Sorkar hna ka thawh ve tawhna pakhata kan Head of Department tawngkam hriatreng ka la nei a, chu chu ‘Mi tupawh nen hian inkawm ila, minutes 20-ah chuan kan duh zawng chu kan sawi vek hman,‘ tih a ni. Officer a ni a, amah rawn kawmtu ni tinin an awm thin a, ani lah chu thu reng peih chi a lo ni lem lo bawk a, a sawi tur tak pawh sawia hriatna ka nei. Ani lah tak a, office-ah kan leng a, office dawrin kan leng pawh a ni ang, chutih hunah chuan kan lennate hun neih dan hre hauh lo maia rei iak thutchilh kan tum tlat thin hi a dik lo a ni. Tlem lai khan kohhran lama kan rawngbawltu feldeuh mai hi ka inah a rawn leng a, ka lawm hle mai. Nimahsela, thingpui ka lum a, kan titi fe hnuah pawh chuan sawi tur vak hre chuang si lo hian a la thu reng mai a, haw sela ka ti pawh a ni chuang lo a, kei lahin thil tih laklawh lai ka nei bawk nen chuan ka thiltih lai thulh meuha kawm reng turin minute tam fe chu kan titi tawh bawk si a, hun nei rengin ka inhre bawk si lo a, lehkhabu chhiar tur ka pe ngawt mai a, ka thiltih lai chu ka tihsan mawlh mawlh ta zawk a, zahawm ka ti ang reng viau mai. Hetiang hian kei ngei pawh mi dang inah ka leng fo bawk a, ngamtlak tak tak inah te pawh ka leng foin chaw ei nghal chang pawh ka nei thin. Nimahsela, an thiltih lai thulhtir reng erawh tha ka ti ngai lo. Inlengte chu ngaihsak tur an ni nameuh mai a, thil dang tih laklawh lai kan neih pawhin chawlh rih hial pawh a tha. Mi fing zawk te’n ‘Time is Money‘ an tih hi a dik chiah a, hun hi a hmang thiamtu tan chuan hlawk takin an lo hmang thin reng bawk a ni. Fritz Kreisler chuan mipui hmaa rimawi chi hrang hrang a tum thin a, mipui tamna hmunah tumin sum tam tak lak luh nan a hmang thin a. Nu pakhat hian, ‘I tum anga mawia tum thei tur kha chuan ka dam chhunga beih tluan chhuah zak pawh ka hnial lo,’ a ti a, chu Violin tum thiam hmingthang chuan eng danga chhang lo chuan, ‘Ka bei a sin,‘ tih ringawtin a lo chhang a. Rah chhuah tur kan nih chuan chutiang chu kan ni tur a ni. Mihringah hian rah duhawm chhuah thei tur khawp thiltihtheihna tur chu a awm sa reng a; mahse, chumi hman tangkai theihna chu thawhrimnaah a innghat a ni. Tui zawng zir thiam leh phi chung lam hi a ni lo. Rah chhuah tura nun chu thawhrim a, awmze neia thawh a, kan tumna lama tha zawng zawng pek a ni mai. Chumi daltu apiang chu paih thlak ngam a ngai a, kan thiltihlai ata kan mit la sawntu a piang chu hlawhtlinna kawnga min daltu a ni. Chumi a nih vang chuan mi fing apiangte hian hun hlutzia an hre thin a ni. Mi hlawhtlingte chanchin sawi tur tam tak kan hria ang, Thomas Alva Edison ngei pawh khan chanchin ngaihnawm tak tak a nei a, a thawhpuinu Mary nena an inneih tur hun pawh alo hai pek a, Laboratory room atangin a nih kha Biak In lam a pan. Khatiang khawp khan a thiltihlaiah in pumpek lo sela chuan Edison hi kan hre hauh lo ang. Hun hi a hlu a, a man a sang a; nimahsela, mi thenkhatte hun hman danah erawh hi chuan hun hian man a nei lo mai pawh ni loin an hun hman that loh avangin a hnu rei tak thlengin a la nghawng zel a, khaw eng hmu ngam lo khawpa awmin, inchhirna khurah an tla lut zawk thin a ni. I hun i hmang tha em le?