Hripuiin Mizoram nasa takin min tuam mek a, ram pum huapa tehna hrang hrangah a sang ber emaw a sang lamah kan awm ta fo mai.  

State te reuh te, micheng pawh tam lo tak kan ni chungin   mihring cheng atanga tehin hri kai thar tamna hmun kan ni a, nitin a sang biin kan chhiar mek a.  Hri vei mek tamna hmun kan ni bawk a, hetih rual hian dama chhuah tir kan tam loh lai a ni bawk a ni.

Hetiang kan dinhmun a nih laiin ram pum thlirin chhim lama state pahnih khatin hripui hi an buaipui deuh tih loh chu an dinhmun a zia niin a lang a. Covid test kan neih tam vanga sang pawh ni ila kan harsatna sut kian theih loh inkai-chhawng an pung zel tihte, hri kai dama chhuah tir  tlahniam leh thin te bakah a veite damchhung a rei tih chen hian kan ngaihtuaha ruahmanna hrang duan a hun ta hle.

Hmang chang hria doctor kan neih te 4C leh 3C vilin an buai nasa bawk sia, thil dangah ngaihtuah na an hmang hman tawh lo niin a lang bawk a. Zau zawka inkoh khawma rel leh luih hian kan buaina a su kiang loa,  hri a ti kiam bawk lo  tih a chiang ta. Hri do hi ngaihtuahna hrang hlaka thlak (paradigm shift) emaw ngaihtuah dan pangngai  lo deuh (out of the box/divergent thinking) a ruahmanna (strategy)  kan neih a hun tawh tihna a ni. 

Kan society zia nen hian covid mila nun (Covid appropriate behaviour) hi a harsa hle a nih hmel a, inzirtirna erawh thlahthlam chi a ni lo ang. Nitin report en hian kai tam ber hi  contact chhui ngai  an ni fo mai a, eng tin tin emaw chuan kan la inpawh nia a lan lai hian tun tum hri hi a let tam taka kai awlsam a nih avangin a vei thar hi kan tlahniam thei lo a ni tihte pawh buk tham a awm tho mai.

Kan public health expert te eng anga thui nge hman tangkai an nih tih zawhna a awm a. Rawn kim an ni thin em? tihte ngaihtuahnaah a awm rum rum tawh a.  Heng mite hi thutkhawma tira an thiamna hman  a hun tawh a ni.  Thiamna hran nei bikte hi kan lo hmang tawh viau a nih si chuan kan dinhmun en hian ngaihtuahna dang hlak neih a ngai tihna a ni a. Huat thu suhah hei hi kan thei lo a nih pawhin pawn lam atangin public health expert te ko lut tawh mai ila, anni in kan khawtlang nihphung (society) milin ruahmnanna siamin hman nise, tichuan zawi muangin kan zalen thei mahna.

Hetiang anga hmalakna hi hmun dangah pawh an tih tho thin a ni a, sawrkar pawhin mipui tawrhna hriain tlawmah a la tur a ni lo ang.

Covid thawhkhatnaah sawrkar, kohhran leh khawtlang an tanrual avangin kan state a hmingtha hle a, tunah pawh chhunzawm zel ni mahse a sawt tawh lo a nih chuan a do dan hi thlak a hun tawh niin a lang a. Sawrkar hian hma a lak chak a ngai ta hle mai.