Hripui kara hmasawnna zir chian tulna NGO (leh sorkar pawh?) hian humsual dai palh ang em?

Admin - May 29, 2021

LLTF/VLTF, Frontliner te tan pawh rorel, remruat dan leh tih dik loh palh awm thei tak a ni fo dawn a; chuvangin, insawiselna lam aia infin chhuahna lam kan mamawh tlan hun tak a ni

H. Lalhmachhuana
Zobawm In

Covid-19 hri chimawm tak, khawvel ram dang  pawh tibuai em emtu hian keini Mizoram mipuite pawh min timangang tak meuh mai a. Party mi leh sa bik maw Kohhran pawl bila mi pawh inthliarna awm  miah lovin sorkar, NGO, kohhran leh mi tin mai hian mahni theihna zawn theuhah he ral tihbawiawm tak hi kan do tlang vek a ni ta ber a, mipui nunphungte pawh a mangangin hmasawnna hnathawh chi tin deuh mai an chawlh deuh thup a tul hrih a ni ber bawk a. Tin, he kan hripui dona kawnga a hnarkaitu ber ber kan sorkar te, NGO, kohhran leh LLTF/VLTF ten thahnem ngai takin an thawk hi Pathian pawhin mal a sawm zel thin a tih theih hial mai. Ni e, he hripui hian min kiansan hma zawng chuan sorkar leh ram mipui hian he ral do hi hnapui ber leh pawimawh bera kan neih a tul zel ngei dawn a. Chutiang a nih mek lai chuan he kan ral beihna a hnarkaitu berte – sorkar, LLTF/VLTF, Frontliner te tan pawh rorel, remruat dan leh tih dik loh palh awm thei tak a ni fo dawn a; chuvangin, insawiselna lam aia infin chhuahna lam kan mamawh tlan hun tak a ni.

He hripui donaah hian thahnem kan ngaih hlawm em avanagin ‘Pafa sabengtung zuar’ thawnthu an sawi ang deuhin, sorkar hmalak dan tur tha zawka ngaihdan/duh dan rawtnate chi hrang hrang kan nei hlawm a.

Tin, he hripui dona hi engto leh hnapui bera kan neih mek lai hian ram mipui tan thil pawimawh dang hlamchhiah leh ngaihthah palh a pawi thui tur an awm thei nual dawn a. Tunlai hian social media leh chanchinbuahte kan hmuh angin ram hmasawnna lama hmalakna (projects…etc) kal mek thenkhat chu tihtawp or thlak danglam rawtnate an awm niin a lang a. Kan ram hruaitute leh mipuite hian ram tana thil pawimawh dang ngaihsak hman lek lova he hripui donaa kan inhman zawh lutuk chuan a pawithui thei dawn a. Tunah hian he hripui dona hi thupui bera neih chung hian, ‘a dangte chu tih thulh chuang lovin’ (Lal Isua sawi angin Mt-23:23) ngaihsaka, zirchiana thawh zawm tur chi kan nei nualin a lang a, chutianga ngaihtuaha zirho tur thil zinga 2 emaw zirhona nei dawn ila-

a) Development Board-te thiah a tul em?

Chanchinbu (social Media) lamahte kan lo chhiar angin Covid-19 hripui buaipui nan sum tam tak a tul avangin sorkar hian SEDP pual sum a neihte hi Dev. Board-te enkawl nan ai chuan Covid-19 do nan hman zawk ni se, Dev. Board-te hi thiat vek ni se tih rawtna a awm a ni a. Ni e, a rawttute hmuh dan leh ngaihtuah dan hian hna thawh hmuh tur awm mumal si lova Dev. Board 10 chuangte senso hi he Covid hri hlauhawm beih nana hman zawk thaa hriatna hi rawtna awm tak,  sum hman zui dan tha tur nihna chen a awm a. Chutih rualin Covid vanga hna thawk tha thei lote kan tihtawp zel chu a fel ber lo mai thei a, sorkar hnuaia hna siam dang te, entir nan school zirtirtute hi school kai theih loh chhung chu an hna tihtawp a tul ve angem? Dev. Board-te hi sorkar hian department-te tha tihchakpui leh sum hnar dangte hai chhuah dan buaipuia hmasawnna nghet (sustainable development) thlen kawnga thawk tura a duante an ni a; (Bible pawhin, “Remruat thiam tamna ah himna a awm” Tf-11:14 a lo ti bawk). 

Kan hriat sual loh chuan board thenkhatte hi chuan hna tangkaite thawk mekin sum hnar dang hai chhuahna project chi hrang hrang an buaipui mek a, Vety Board phei chuan an project buaipui hnuaiah mi (vawk/ar) eng emaw zat an tanpui (enkawl) mek a ni awm e. Dev. Board-te hi thawh nei miah lo chu an ni bik hmel lo va, Covid kian hma chuan mi dang ang bawka hnathawk chak thei an ni bik lo vang le. Engpawh nise Covid hripui dona atan sum sawhkhawm dan tha tur nia hriatte rawtna siam hi Sorkar tan pawh tan lak dan tur thiamtirtu a ni mial mahna.

b) Luipui kam (RRF) ram tha lai hman dan tha eng nge?

Mizorama lui 16 kam lehlam lehlam km chanvete chu ramngaw anga humhalh (Reverine Reserve Forest - RRF) ni tura kum 1965-a sorkar thuchhuah (notification) tawh chu Gauhati High Court, Aizawl Bench chuan kumin January 27 khan a thiat ta a ni a. Hetia kan ram ngaw neih tam remchanna lai (RRF)-te hi tihtawp an nih chuan environment lamah kan tlakhniam hlauvin mi/pawl thenkhat chuan high court thutlukna hi sut a nih leh theih nan sorkar/court-ah thlen tumna awm nia sawi a ni a. Heng mi/pawl hruaitute ngaihdan hi pawmawm tak nihna a awm thei a. Sawi rawtui thiam tan phei chuan environmental angle atang chuan sermon ngaihnawm tak sawi tur a awm hial dawn a ni.

Engpawh ni se, helai thu hi ‘Ram hnuk khawih thil’ (sustainable development factor) a nih avangin environment angle atang chauha thlira thutlukna siam chi niin a lang lo va, thlirna kil hrang hranga thlira zirchian tul tak a ni a, ‘Economic angle leh historicl evidence’ te hian hmun pawimawh tak an luah a lo ni a.

District council neih hun lai (ram buai hma) khan Silchar leh Karimganj lam mi (vaiho)-ten kan ram luipui kama maute chu an tawlh thla vak vak thin a, venghim turin district council chuan forest staff-te a la nei si lo va; chuvangin, chutiang tireh tur leh keimahni ngeiin kan ram thil kan chhawr theih nan tiin kan council hotute chuan he RRF dan hi an rawt chhuak ta a ni a. Tin, state puitling kan lo nih hnu, kum 2011 March 25 khan kan State Assembly chuan, “Kan ram luipui kam eng emaw zat hi eizawnna atan ram tha lai Assam sorkarin kum 1965-a Revirine Reserve Forest Area-a a lo rin luh hi highland area-ah sawn turin Mizoram sorkarin hma la rawh se,” tiin lungrual takin resolution an lo siam tawh a. Hetia high court-in thutlukna a siam hma pawh hian mizo mipuite tana rorelna in sang assembly chuan 1965-a luipui kama RRF rin luh chu titawp tur leh environment vawng tha turin highland a sawn turin a lo rel thlu tawh a.Hei hi ram mipui eizawnna that zawk nan leh Environment (leh tui hna) vawn nan a that hle pawh a rinawm reng a ni.

Tin, tunlaia mi thiamte ngaihpawimawh ber fo chu ‘Sustainable Development’ (tunah leh thangthar zel tur tana ei bar zawnna tluantling din) a ni a. Mizoramah hian ram leilung hanna hmun kan luipui kam te hi tunah leh thang lo thar zel tur tan pawh a eibar hmuh zelna remchang an ni a, kan state assembly pawhin eizawnna atana hmun tha laite RRF a nihna hai lan a sawn tura a lo tih tawh leh high court thute hi a inremin mipui tan hian a chhenfakawm hle a. Bible thu (Isaia 32:20) pawh hian tui luanna zawng zawng kama chi theh thinte chu mi nihlawh an nih thu a sawi reng a ni. Chu mai bakah heng kan ram luipui kamahte kum tin lung man - balu leh tiau te fur ruah ten min chhekkhawmsak hnur thin a, heng balu/tiaute hi kan insak nan leh kawngpui siam nante hman tangkai zel nachang kan hriat (sorkar leh mipuiin) a hun tawh tak zet a.Kan laka kan hman ve zel loh chuan phai ramah luipui tuiin min phurh thlaksak daih a, chung balu te chu phai vai ho hnen atang kan zuk lei leh si thin a (Chhurbura techtic!!!?) tunah erawh chuan kan luipui kam leitha te hi buh leh thlai chin nan a hman uar mai bakah kumtina balu leh tiau lung fur ruah tuiin min chhekkawmsak te I hmang tangkai zel ila.Langkaih lui (Luimawi khua) a motor Engine hmanga balu an lakchhuah thiam dan te hriat chuan kan ramchhung luia balu lak theihte lakchhuah zel nise Economic lama intodelh kawng a ni ngei dawn a. Sustainable Development tactic hmangtute kan ni thei ang a. RRF chu luikamah ni lovin highland-ah ni se a fuh zawk hle lo’ng maw?

Tribal affair minister pawhin tribal ram chhung mipui ten an ram chhung thil (thing, mau, hmunphiah, balu…etc) te zalen zawka an lak phalna thupek pawh a chhuah tawh a ni lawm ni kha? Kan ram leilung hausakna hai chhuahnate dang bet tur zawngin tunlai hian kan CYMA hruaitute (leh sorkar) hian hmalak kan tum mek a ni zawk ang em? Zirchian lehzual a fuh lo’ng maw? Kum 2011-a assembly-in a lo pass tawh – Reverine Reserve Area-te chu lui kamah ni tawh lovin highland-ah sawn ni zawk tawh se, tia a rawtna kha Mizoram hian a thatpuiin ‘Sustainable development’ atana lukhawng nei tak pawh a ni zawk lo’ng maw?

Tin, luipui kamah emaw, hmun dangah emaw, ramngaw atana humhalh tura remchang lai deuh chu Zoram khaw tin hian kan nei deuh vek a. Chutihlaia lui kam zawng zawng forest area atana humhalh vek a nih chuan mi tam tak eizawnna leh leilung hausakna hai chhuah kan dang chat vek dawn a ni mai lo’ng maw?

Share now