Aizawl East 2 bialtu MLA Robert Romawia Royte chuan tunhnai khan a bial chhunga veng pakhatah covid 19 test runpui ama sensoin a buatsaih a, mi tam takin hripui an kai tih hmuhchhuah a ni a. Hmuhchhuah ni lawk lo se midang an in kaidarh zel thei a, chu bakah enkawlna an hmu hma thei tur hi thil tha tak a ni.

Health Minister hoa thu-khawm chuan  containment area ah  nasa zawka test kalpui turin an rel a. Chhung-kuaa hri kai an awmin an chhung te chu test nghah tir loa test nghal turin MoT lam chuan an ti bawk a ni.                    

May thla khan hripui vei 6268 lai hmuh chhuah an ni a, a chanve aia tam chu an taksa a hripui lang chhuak khawpin an awm hman a. Symptom nei zingah positive contact an tam ber a, positive contact te symptom neia an awm hman thin hian ngaih a ti tha lo a ni. Chhungkuaa inkaidarh ang chiah phei chuan natna a lan hma emaw midang an kai hmaa hmuh chhuah a tul lehzual hle a. Mithiamte’n covid 19 donaah test hma, hmuhchhuah hma, enkawl hma tih an sawi fo thin a. Tuna kan test dan kalphung hi siamthat a ngai tih a tilang chiang a, kan thlak har lek lek zawk em? te pawh a tih theih awm e. Covid 19 test kalphung thar siam te hi tha taka kalpui theih a nih chuan hri do kawngah hmasawnna thlentu a nih beisei ang.

Containment area piah lamah positive pun chakna hmun te pawh hi thlir zuia dinhmun thaloa an din hmain random test neih theih hram ni sela a lawmawm khawp ang. Hripui vei damlote senso hi sawrkar in a pek let leh tur a nih avangin positive te enkawl vak an ngaih hma emaw midang an kaidarh hmaa hmuhchhuah mai hian sawrkar pawhin sum a sen tlem a rinawm bawk a ni.     

Nimin maiah India rama covid 19 hri insiam danglam Delta variant an tih chu kan ramah pawh a luh tawh tih finfiah a ni a. Community transmission a nasa tih kan chiang tawh a, hri tharin min chamchilh tawh tih a chiang bawk a. Heng vang pawh hian hripui hian eng anga tak thukin nge min luhchilh tih hriat a tul a, enkawl tur dap chhuah a tul viau tih a tilang a ni. 

Hripui do kawngah Mizoram kan vannei hle tih sawi a ni fo thina, hlawh phut miah lo task force kan din thei mai a, an tangkai em em a. Hemi bakah khawtlang leh kohhran thlawpna a tha em em a, an hmunhma neih te sawrkarin a la hmang leh thei zel a, tunah phei chuan khawtlang enkawl bik community covid care centre hial te pawh engngemaw zat kan nei thei tawh a ni.  Thui tak chu heng hian sawrkar a chhawk ngei ang.    

Eng pawh nise, test neih tam leh awmze neia  test neih pawimawh zia a rawn lang zel a. Kan hun tawn azirin siam danglam ngai a awm a nih  pawhin a rang thei ang bera bawhzui a nih zel beisei phawt ang.