Covid 19 chuan thla 10 dawn lai Mizoram a luhchilh tawh a, tunhnai hian hri inkai chhawng a tlahniam deuha a lawmawm viau a. Hetih lai hian van-tlangah min chenchilh tawh avangin fimkhur hunlai tak a ni a, inthlahdah a thiang lo a ni.

Tun hnaia hripui inkai dan hi enin kaina hriat mai loh chhui zui ngai an ni deuh zel a, a then phei chu chhui chhuah theih loh te pawh an awm a ni. Nimin maiah sumdawng hripui kai an awm palh leh hlauh mai a, an dawr a lun avang in Aizawla Veng pakhat chu tlawhpawh theih loha kharkhip nghal a ni a. Khawilai atang in nge hripui hi a rawn thawh leh dawn? tih a hriat tawh loh avangin mipui an fimkhur reng a pawimawh khawp ang.

December thla khan hripui kai zat chu Mizoram-ah mi 5000 tling tura chhut a ni a, mipui lam tanrualna avangin tun thlengin heti zat hian an la kai lo phah niin a rin theih a. Mahse, tunhnaia kai thar thenkhat kai dan hi chhut chian chuan hripui hian min la chenchilh zia a lang a, tan lak sauh sauh a ngai dawn a ni. Ram pawn atanga lo lut khunghran sa hripui kai palh tam tak neih aiin kaina chhui hleih theih loh neih hi a him lo zawk a tih ngam ang a. Hripui vei mahni inhre miah lo, hnathawk leh tul dang vanga chhuak a awm theih avangin invenna lama tan lak reng a tul a ni.

Kohhran lam pawh bithliah neia inkhawm turin a inpuahchah mek a. AMC inthlan a hnaia boruak enin vote tlak that a beiseiawm viau a, inthlan hi hri darhna a ni ang tihte pawh a hlauhawm deuh a. Hripui vei mek zat a nambar lamah tla-hniam mahse hun rei tak min chenchilh dawn tih hriaiin sawrkar lamin inveng tura mipui a chah hi zawm reng a ngai a ni.