ZALEN December 7, 2025: Boruak a bawlhhlawh leh bawlhhlawh loh tehnaah Aizawl khawpui chu dinhmun thaah a la ding rih a, mihring hriselna atan a la hlauhawm pha lo.

Mizoram Pollution Control Board (MPCB) Member Secretary Er. C. Lalduhawma chuan, “Aizawl khawpui boruak bawlhhlawh tehna ‘air quality index’-ah dinhmun thaah kan la ding rih a, chutih laiin tun hma ai chuan kan sang ve hret hret a. Phai khawpuite ngaihtuah chuan kan la zia-awm hle a, tun dinhmunah chuan kan la him tawkah kan ngai a ni,” a ti. 

Er. C. Lalduhawma chuan thlasik leh thal laiin boruak a bawlhhlawh zual tih sawiin, “Thlasikah hian boruak bawlhhlawh chung lama kal tur kha lei lamah a lo chhuk a, khawvawtin boruak bawlhhlawh a tileng darh nasa bawk a, hei vang hian a bawlhhlawh bik a. Chubakah thal lai hi in sak, thiah leh kawng siam hun a nih avangin boruak bawlhhlawh leng a tam a. Kawng siam leh lei khawihten leivung an hnutchhiah hi lirtheiin a pal khu leh a, chubakah lirthei hi a pung ve zel nen kum tin deuhthaw hian kan boruak hi a bawlhhlawh chho ve hret hret zel a ni,” a ti bawk.

MPCB thawktute hnen atanga ZALEN thu dawn danin February thla atanga April chhung hi Mizorama boruak a bawlhhlawh hun ber niin a chhan ber chu vaivut khu a tam vang te, lo hal vang leh lirthei khu vang niin an sawi a. Boruak hi bawlhhlawh thin mah se May/June velah ruah a tlak thin avangin a ziaawm leh hma niin an sawi.

Thawktute chuan sawrkar laipuiin boruak bawlhhlawh dan chi 12-a teh tur a tih laiin khawl leh hmanrua awm loh vangin Mizoramah chuan chi li - sulphur dioxide, nitrogen dioxide, particular matter (pm10) leh particular matter (pm2.5) chauh an la teh thei tih an sawi a, heng zingah hian particular matter-ah chiah hlauhawm chhinchhiahna a pel niin an sawi. 

MPCB hian boruak bawlhhlawh tehna hi Mizoram hmun 34-ah an nei a, hengte hi Aizawl khawpui hmun ruk bakah district khawpui leh census town pathum - Biate, N.Vanlaiphai leh Aibawk-ah a ni a. Aizawl bikah Khatla (MINECO), Laipuitlang, Bawngkawn, Dawrpui, Lengpui leh Sikulpuikawnah an nei a, heng zingah hian Bawngkawn chu a bawlhhlawh ber a, Khatla (MINECO) chu a thianghlim ber.

Bawngkawn AQI hi nikum February-ah 109 a ni a. A dawttu Dawrpui hi nikumah 103 a ni a. A thianghlimna ber, Khatla (MINECO)-ah nikum February thla-ah 41 a ni.

Mi thiamte sawi dan chuan AQI 0-50 hi tha (good) niin harsatna a thlen meuh lo a, 51-100 hi tha thawkhat (mi awm nem deuh tan thawk harsatna thlen) niin 101-200 hi tha vak lo (chuap leh lung natna nei, naupang leh kum upa lam tan thawk harsa), 201-300 hi tha lo (rei tak hip luhin thawk a ti harsa), 301-400 hi tha lo hle (rei tak hip luhin thawkna kaihhnawih natna a thlen) leh 401 chunglam chu hlauhawm tak niin mi hrisel pangngai pawhin an tuar tawh niin an sawi.