Tun hnaiah sawrkai laipui lam chuan health care huam zau leh mipui tana tangkai tura a duan Ayushman Bharat –Pradhan Mantri Jan AarogyaYojana (AB-PMJAY) hnuaiah mipui te inziaklut turin hma a la mek a, hriselna lam ngaihtuah peih loh tak Mizote hian he thil hi kan ngaihven a tul piah lamah kan in-ziah-luhna ngei tur niin a lang a, kan chhungkaw inrelbawlna thlenga nghawng thei tur a nih avangin he scheme hnuaiah hian kan tel ve ngei theihna tur hma lak a ngai tak zet a ni.
Sawrkar hnuaia health care scheme lian ber “world’s largest government funded healthcare program” an ti hial hi chhungkaw maktaduai 10.74 vel huam tura ruahmann niin, mi maktaduai 50 chuangin an chhawr theih tur a ni a, chhungkaw khatin kum khatah cheng nuai 5 thleng sawrkar laipui atangin hriselna lam kaihhnawih sum min tumsak thei tura ruahmanna hi siam a ni.
National Sample Survey Organization (NSSO) vawi 71 na an thutkhawm tum khan khawpuia cheng za-a- 85.9 leh thingtlang lama 82% te chuan healthcare insurance/assurance hi an chhawr lo niin chhut a ni a. Chutih rualin India mipui 17% te hian an sum dehchhuah atanga 10% zet chu an hriselna enkawl nan hian an hmang thung. Natna khirh khan bik avangin chhungkaw tam tak chuan ba tam tak an neih phah a, khawpuia cheng zinga 18% leh thingtlang lama cheng 24% te chuan he harsatna hi an tawk mek ang chhut niin, mi tam tak chu puk chawpin an inenkawl mek bawk.
PMJAY hian mirethei mai bakah, thingtlanga cheng hnathawh tur nei mumal lo te leh khawpui chhungah pawh eizawnna hnuai hnung tak te chu a ngaihpawimawh te an ni a, chuvangin kan sum neih sa seng lova, Mizoram mai ni lo, state dangah pawh kan hman tangkai theih tur Ayushman Bharat –Pradhan Mantri Jan AarogyaYojana (AB-PMJAY) hnuaiah hian inziahluh a, Golden Card neih hi kan tih makmawh niin a lang.
He card hi sawrkar damdawiin In leh mimal damdawi In hrang hranga hman theih tura kalpui chhoh mek a ni a, mahse, a nihna famkim tur ang tak chuan kalpui a la ni chiah lo a, amaherawhchu he hamthatna zar zo tur hian kan in-ziahluh erawh kan tih makmawh tur niin a lang a, damlohna avanga sum kan sem tam tak kan sen thin chu hei hian thui takin min chhawk thei dawn a ni.