Aizawl : Nimin khan Congress Legislature Party Leader Zodintluanga, MLA chuan thuchhuah siamin, kan dinhmun tawn mekah hian thlamuanna kan mamawh tih tarlangin, thihna ruam atanga min hruai chhuak tur hruaitu chak kan mamawh tih leh thu awihna a pawimawh thu a tarlang.

"Khawvelin hun khirh tak, Corona Virus vanga mipui sang tam tak thihna kan hmachhawn mek a, khawvel khawi lai mah hmun him leh ralmuang a awm lo a ni ber. He hrileng hlauhawm tak avang hian kan nunphung a buai zo a, hlauin kan khur mek a ni. He hunah tak hian mipui hian thlamuanna kan mamawh a, thihna ruam atanga awmze neia min hruaichhuaktu tur hruaitu chak kan mamawh a ni," a ti.

India ramah Coronovirus hi January 30, 2020 khan hmuh a ni tiin, mi 20 zetin an thihpui tawh thu leh invenna atan ni 21 chhung total lockdown a ni tih thu leh Mizoram sawrkar chuan curfew hial a puang tih a thuchhuakah hian a tarlang a. Hetiang karah hian mipui ten thu awih a, kan tawm tlat a pawimawh tak zet tih a tarlang bawk.

Mizoram sawrkar chungchang sawiin Zodintluanga chuan, "Sawrkar lam tih tur niawm tak, an tih loh tam tak mipuiin kan hmu a, kan lung pawh a awi lo ang. Amaherawhchu, sorkar hi bei mai lovin, a tha zawk duhna avangin thurawn kan pe reng tur a ni a, hei hi Opposition Party-te tih tur dik tak a ni bawk. State sorkar-in pawisa a neih loh miau avangin hriatthiamna thui tak kan neih a ngai a, kan zavaia kan tanrual a ngai a ni. Kan zavaia kan tum ber tur chu he 2nd phase chhunga Coronavirus che theilo a dan beh a, a darh zel tur ven hi a ni," a ti.

Damdawi lama thawktute, invenna tha leh sum leh pai nei lo chunga huaisen taka duty, ral hmatawnga awm Local/Village Level Task Force te, venhimna hna thawktu police te, thuthar thehdarhtute, he hri dona atana sum leh tha thawhtu zawng zawngte zahna chibai ka buk rualin, ei leh in kan nghei loh nana rim taka thawktute fak an phu tih a tarlang. Sawrkar puih theihna tur an nei anih chuan CLP chu kan tlanchhe lo ang, tih a tarlang bawk.

CLP Leader hian, Central sawrkarin India ram puma mirethei leh hmeichhiate puihna tur Special Emergency Packages hrang hrang atana Rs 1,70,000 crore a puang chu lawmawm a ti a, Mizoram sorkar pawhin mipui chhawmdawl hna nasa takin a thawh theih phah dawn niin a ngai a, buhfai thlengin a thlawnin a sem theih phah dawn a, lawm-awm a ti hle.