October 14, 2022; ZPM president Lalliansawtan ZPM sawrkar chu a danglam dawn tih sawiin, hruaitu bawr an invuah danah buaina an neih loh thu a sawi a. Kum 2023 MLA inthlanpui neih turah an party in MLA seat 40 an chuh kim dawn tih a sawi.

Vawiin October ni 14 khan Aizawl press club ah thuthar thehdarhtute kawmin, ZPM president chuan, Pathian leh mipui zarah sawrkarna an chang ve hlauh te a nih chuan an danglam dawn a, an hotuten ZPM sawrkar ruangam tur hmun hrang hrangah an tlangaupui mek tih a sawi.

Hruaitu an invuah dan chungchang sawiin, "Leader, President, Working president bakah Val Upa Council te kan ti a, sawi pawh a hlawh hle. Heng kan hruaitu bawr invuah danah hian buaina kan nei lova, a remchangin a tha hle a ni tih a hmangtute hi chuan kan hria," a ti bawk.

Thuthar thehdarhtute zawhna chhangin ZPM hruaitute chuan kum 2023 MLA inthlanpui lo awm turah an party in seat an chuh kim vek dawn tih an sawi a, an candidate tur tihfel an la neih loh thu te, bial vil tur pawh tumah ruat an la neih loh thu te an sawi.