Kan dinhmun: District Council atangin U.T. kan han ni a, chuta tangin state. Central sawrkarin kan  intodelh nan leh kan inenkawl zelna atan kum tin cheng vaibelchhe tel tehmeuh min rawn pe thin a; mahse, vawiin thlengin a rah hmuh tur a la awm lo. Ei leh barah ka la intodelh chuang lo va, a kaihhnawih - teak phun, rubber, etc. tih velah pawh engmah tun thlengin kan la ni chuang lo. Central-in sum min pek chu a ral reng tho a; mahse, a hnathawh hmuh tur a awm meuh lo, a run dalah tih mai loh chu. Zirna lamah kan thang nasa hle a, PhD-te pawh kan awm fer fur ta mai; mahse, a thawh tur lam a awm leh si lo, zirlaite an beidawn a hlauhawm hle mai. Industry, factory han tih tham deuh pawh vawiin thlengin kan la nei lo, eng nge kan harsatna ni ang aw, state dangte chuan an nei thleh thluah thei si a. Intinalh taka motor chhuak thar apiang neih zel a, tlan kual vel mai mai hi kan tih theih tawk a ang riau, a zia lo hle mai. Vawiin thlengin thawn chhuah tur mumal nei lo, intodelh lo kan la ni reng a ni. Hruaitu tha: Bible-a hruaitu tha leh ropui kan hmuh chu Mosia kha a ni awm e. Kanan lam panin mipui phunchiar leh luhlul tak maite kha kum tam tak chhung a hruai a nih kha. Hruaitu tha han tih hian leadership nei tha, mi tling, a ngiahna hria, etc. kan ti thei awm e. Hruaitu tha chuan ram thatna tur a nih phawt chuan mualpho leh chân pawh a inhuam a. Mahni party thatna tur ringawt leh lal rei theih dan tur ringawt a ngaihtuah ngai lo va, mipuiten an buk tling zawk mai thin a ni. Kan thenawm lawka mi, Manik  Sarkar te khu kan hria ang a, a that em avangin a sawrkar kha mipuiten an ning hlei thei lo anih kha. West Bengal Chief Minister hlui, Jyoti Basu te pawh kha rorel thiam, mi rinawm a ni a, India rama CM ni rei thei ber record thin hial a ni. A thih hnu pawh khan mi dangte tan tiin a taksa bung hrang  hranghote pawh a donate vek a ni. Tuna kan Prime Minister ni lai mek pawh hi kan hre theuh ang a, Gujarat C M thin a ni a, a hnathawh that em avangin ram khat hruaitu lu ber lo ni ta a ni. Mipuiten kan zir ve a ngai: Eng emaw deuhah chuan kan ram hruaitute kan mawhpuh deuh zel mai, a dik viau a; mahse, mipuite pawh hian kan tidik lo ve bawk thin a nia. Kan hruaitute pawh hi kan vir nasa ve bawk a, thenkhatte phei chuan thilpek eng eng emaw nen, a tawpah kan dem leh hle si thin a. Kan duh anga thil kan tihtir theih loh chuan kan rel phar viau zel mai a, anni tan pawh thil dik lo tih mai pawh kha a awlsam ta thin a ni. Hna lak tur chungchang thuah ni se, mahnia inziah tlin tum aiin Minister-te hnena sawia inthuntir hi kan tum dan a ni tlangpui bawk. Inthlan laiten kan han pui ve a; mahse, nakinah kan puih ve man kha uar takin kan han bill leh si thin a, anni tan a lo nuam tawh mang si lo a, duh lo chung chungin thil tih âwm mang lohte kan tihtir ta thin a ni. Mipui lamte pawh hian kan mawhphurhna kan hriat ve a ngai, kan hruaitute hi nawr vak vak lo thin ila, chu ai chuan khalh ngiltuah tan i tum zawk ang u. Mihring ve mai an ni a, a theih phei chuan i tawngtaisak ve fo thin zawk ang u. Ram hmangaihtuten kan rilru sukthlek kan tihdanglam a ngai: Ram hmangaihtute han tih hian kan vaiin kan ni a; mahse, party unit level atanga  a lu ber thlengin, tihah han sawrbing deuh ta ila. Party mite kan inhriat chian a ngai, kan hna hi hna pawimawh lutuk, kan tute, tute leh thleng pawh a nghawng thei thil a ni tih kan hriat a ngai. Thenkhat chuan sum leh a behbawm kan hmuh theih dawn phawt chuan engmah pawisak kan nei lo mai thin, a tha lo hle. Eizawn nan, hausak thut theihna tih lam ringawt a kan  ngaihtuah chuan a dik thei lo vang. A hruaitu lamah pawh lalna leh thuneihna kan han chan chuan kan tlin chhan ram leh hnam kha kan theihngilh mai thin. Chhungte leh mahni inhai vur nan, lal tak tak emaw kan inti ta mai thin. Kan han lal rei deuh a, kan lo nuam ta a, tumah kan hre tawh lo, rethei leh chanhaite phei chu khawiah a ni ringawt tawh mai. Ram hmangaihtuten sum tam tak aia hmingthat kan thlan ngam a hun ta hle mai. Ram hruaitu ropui tak takte chanchin kan hre thin ang, a ngaihnawmin ram mipuiten an hlawkpuizia pawh kan hria ang. Vawiinah keini pawh hruaitu ropui tak kan ni ve thei reng a ni, i tum chuan, engkim chân i inhuam chuan i hlat lo a ni, tih in hre rawh le. Khawvela  ram hruaitu ropui tak takte chanchin in chhiar chuan an lo hausakzia emaw, thil tih theihzia emaw lam a ni lo. A tirah chuan berh ve tete, fing lo ve tak takte an ni; mahse, an tumruhna te, rinawmna te, taimakna te an vawng tlat a, a tawpah an lo hlawhtling ta thin a ni. Awle, vawiinah keini ram pawn Pathian tih mi, hruaitu tha, tling, a ngaihna hria kan mamawh hle mai.