Mizoram Volleyball Association (MVA)-in khua leh khua, veng leh veng inelna a buatsaih turah hruaitute rin leh beisei lawk ang ngeiin tel an thahnem dawn a, team 107 lai inlan turin an inziak lut.

JJS Trucking BharatBenz Inter-Village Tournament 2023 hi Thawhtanni zan hian ‘Spike Off’-a bul tan a ni dawn a, Chanmari YMA Hall-a spike off-naah hian fixture pawh tlangzarh nghal a ni ang.

Inter-village tournament-ah hian Thawhlehni thleng kha tel tum tan inziah luhna hun hawn niin team 107 an tel dawn a. Mipa team 80 leh hmeichhia team 27 tel turin an inziak lut.

Kumin inelna hi All Mizoram Village Council Association leh Aizawl City Local Council Association remtihpuina leh hriatpuinaa buatsaih tur a ni a. MVA General Secretary C Lalrokhuma (Puitea) chuan a boruak atangin tel an tam dawn tih a lo sawi tawh a, a sawi ang ngeiin tournament hnuhnung ber aiin tel an tam fe zawk.

MVA-in inter-village tournament a buatsaih hnuhnung ber, kum 2019 khan mipa team 52 leh hmeichhe team 18 an tel a. Kuminah erawh mipa hi a hnuhnung ber aiin team 28 zet leh hmeichhia pawh team kua laiin an tam zawk dawn a ni.

Puitea’n, “Tun kum hnih thum chhungin Mizoramah volleyball boruak a lian tharin khel an tam zual hle a. Nikum leh kumin boruak atangin team tel an tam viau dawn tih a hriat theih,” tia a lo sawi lawk chu a dik ta a ni.

Inelna neih hnuhnung berah khan mipa final-ah Maubawkin final-ah 3-1-a Hunthar hnehin an champion a. Hmeichhe lamah Kolasib Diakkawnin final-a 3-0-a Thenzawl East hnehin an champion thung.

MVA hian kum tina veng leh khaw inelna a awm theih nan Central YMA-in a huaihawt loh kumah inter village tournament hi a huaihawt thin a. Kum hnih dan zelah a huaihawt tihna a ni a, kum 2021 erawh kha chuan Covid-19 leng avangin a huaihawt lo thung. 

ZALEN-in a MVA general secretary a biaknaah dan an zamah ‘mahni vote neihna khua/vengah theuh khelh tur’ tia an dah chu khauh takin an kengkawh dawn tih a sawi a. Tun hma lam pawhin hetiang dan an zam hi an kengkawh thain zawm pawh a hlawh viau thin tih a sawi bawk.