Aizawl March 6, 2023: Sawrkar Laipui Department of Drinking Water DDWS, Ministry of Jal Shakti buatsaihin Vigyan Bhawan, New Delhi-ah Inrinni khan Swachh Sujal Shakti Samman (SSSS 2023) hun hman a ni a. India ram hmeichhiate zinga tuihna humhalh kawnga hma la tha, 'Water Warrior Award' an pek mi paruk zingah HS Lalawmpuiin chu Award dawng zingah hian a tel a ni.

He hun hi India rama hmeichhia te zinga faina, tuihna humhalh leh water supply system enkawlnaa thawk tha te chawimawina atana buatsaih Mizoram atangin HS Lalawmpuii, Sairep, Lunglei District VCP chelh mek chuan India President atangin he chawimawina hi a dawng a ni. Water warrior award hi National Water Mission hnuaia Jal Shakti Abhiyan (JSA) hnuaiah pek niin, HS Lalawmpuii hi PHED leh Office of Deputy Commissioner, Lunglei District te ruahmannain PHED Official pahnih leh District danga Tui leh Faina kawnga thawk tha hmeichia pali ten an tawiawm a ni.

HS Lalawmpuii hi Sairep khaw VCP ni mekin, term hnih a chelhna a ni a, an khuaah hian PHED chuan Jal Jeevan Mission(JJM) project an kalpui meka; He project atang hian Sairep khua chuan a vawikhat nan chhungkaw tinte kawtkaiah tui connection an neih phah tawh nghe nghe a ni. HS Lalawmpuii hian tuihna humhalh kawnga a thawh hlawk avang te, ruahtui khawl that kawnga an khaw tana a thawh hlawk avang te leh lui leh tuihna dang hmunhma vawn fai kawnga hma a lak that avang te'n "Water Warrior" award hi a dawng a. Award a dawn theih nan hian PHED leh NEIDA chuan an buaipui a ni.

JJM hnuaiah hian PHED chuan Implementation Support Agency (ISA) atan NEIDA thawhpuiin, tun dinhmunah hian NEIDA hian Sairep khaw telin Mizoram khaw hrang hrang 100 a enkawl mek a, tuihna tihpun leh humhalh, ruahtui khawl, tui tihthianghlim leh water supply enkawlzui kawngah hma a lakpui mek a ni.