Aizawl: Hmar Students Association (HSA) chuan thuchhuah siamin July ni 7,2017 khan Lalringum Sanate, CEC member & Assam State Co-Ordinator, Hmarkhawlien (Assam) chu Vairengte Police Check Gate ah Inner Line Permit (ILP) dil/phut a ni tiin hriatthiam har an ti hle tih an sawi. HSA chuan Zoram chhungah ngei Police Duty thenkhatin an hruaitu lian, ILP an dil/phut mai pawh duh tawk lova hmusit leh diriam taka an tawngkhum chu na an ti hle tih an sawi a. “Zoram chhung leh pawna tlawmngai pawl hrang hrangin Zofate inunauna siamthat tuma beihpui kan thlak mek lai a, Police Duty thenkhatin in unauna ti chhe thei ang zawnga hma an lo la hi kan dem tak zet a ni,” an ti a. HSA chuan, “Mahni unaute ILP lo dil/phut zut zut chingho hi chu ramri depa Duty tlakah kan ngai lo a, an chungah an phutawk hremna pe ngei turin thuneitute kan phut a. Hetiang tih ching an awm fo chuan Zofate hi inpumkhat ai mahin kan inkar hi a khi zau tulh tulh ang tih a hlauhawm hle a ni,” an ti bawk.