ZALEN Sept. 6, 2024; Aizawl Traffic Media Cell in High Security Registration Plate sawifiahna a tichhuak.

India rama lirthei rukbo hluar zel alo ziaawm theih nan te, pawikhawihna atana lirthei hmante man chhuah thuai a nih theih nan leh Section 50 of the Central Motor Vehicle Rules, 1989 dan kalha lirthei neituten; an duh dan ang anga lirthei number an ziah thin tih bo nan te, lirthei a him zawk nan leh awlsam zawka lirthei rukbote chhuichhuah a nih theih nan Sawrkar laipui, (Ministry of Road Transport and Highways / MoRTH) India ram puma hman turin High Security Registration Plates (HSRP) chu a kalpui ṭan a, Mizoram ah pawh 27th April 2012 atanga hman turin State Sawrkar in Order a chhuah a. India ram puma HSRP hman tura tih a nihna chhan hrang hrang te chu:

Lirthei rukbo tihtawp: Number plate pangngai chu awlsam taka tihdanglam emaw thlak danglam theih a nih avangin dan kengkawhtute tan lirthei rukte zawn chhuah a harsat phah hle thin. HSRP hian tamper-proof features a neih avangin tihdanglam harsa taka siam a ni a, a lem/duplicate siam a harsa, he security feature avang hian lirthei rukbo te awlsam zawkin a hriatchhuah theih thin a ni.

Number Plate inang tlâng: Sec 50 of the Central Motor Vehicle Rules, 1989 chuan India ram puma hman tur; lirthei number plate len zawng, hawhrawp leh number ziak len zawng te, HMV/LMV/Two Wheeler-a hman tur len zawng te uluk takin a bithiah vek a. Sec 50 MV Rules-in a bithiah ang thlapin HSRP-ah chuan ram puma lirthei number plate-te chu inang tlang veka siam a ni a, dan kengkawhtute tan awlsam takin lirthei a chhinchhiah theih phah a ni.

Enhanced Security Features: HSRP hian security feature - chromium-based hologram, laser-etched Permanent Identification Number (PIN), leh Non-removable Snap Lock-te a keng tel bawk. Heng thilte hian plate siam chawp emaw, tihdanglam emaw a ti harsa hle a.

International Standards zawm: Khawvel pum huap Inernational Standard nena inmil turin India chuan a lirthei registration system chu HSRP hmangin a tichangtlung a. Ram changkang tam tak ten hetiang high-security plate hi an lo hmang tawh a ni.

Supreme Court Directive: Supreme Court of India chuan kum 2000 chho atang khan thupek a tichhuak a, Central Sorkar hnenah lirthei rukbo leh inbumna tihreh a nih theih nan HSRP chu ram puma hmang turin a hriattir a ni.

Road Safety and enforcement: Registration plate inang tlang, changtlung leh hmuh awlsam: HSRP hian traffic management te, road safety te, dan bawhchhia man chhuah kawngah te, Traffic Police-te leh enforcement-te a pui hle a ni.