ZALEN April 29, 2026: School Education Minister Dr Vanlalthlana chuan vawiin khan a office chamber-ah thuchah sawiin Mizoram Board of School Education buatsaih, Higher Secondary School Leaving Certificate Examination 2026 result chhuakah zirlai exam hmachhawn mi 12,243 atanga za zela 87.67-in hlawhtlinna an chang thei leh kum hmasa aia pass percentage zaa 6.57 laia a sang chu lawmawm a tih thu a sawi.

Minister chuan kumin result chhuakah Govt Higher Secondary School zirlai pass zat chu stream hrang hrangah zaa 80 chung lam an ni thei vek tih sawiin kum hmasa lama result neih dan han thlirin zirlai pass percentage zaa 80 an la pel ngai lova, kuminah erawh stream tinah an pel vek a ti a. Sawrkar sikula zirtirtute leh zirlaite taimakna a lo lang chu a lawmawm a tih thu leh a chhuan thu a sawi. Candidate zawng zawng pass vekna sikul neitu zirtirtute leh zirlaite pawh a lawmpui thu a sawi bawk.

Minister chuan zirlai hlawhtlinna chang thar zawng zawngte thinlung taka a lawmpui thu leh zirna sang zawk an zir chhohnaah hlawhtlinna an chan zel theih nan duhsakna sang ber a hlan thu a sawi. Tun tuma hlawhtling rih lote chu beidawng mai lova nasa zawka tan la tur leh chhungkua leh ram tana hlawhtlinna sual chhuak turin anmahniah theihna duhawm tak a awm tih hre reng turin a chah a ni.

Minister chuan a hun taka result tih chhuah a nih theih nana thawktu MBSE officer leh staff te, Higher secondary school zirtirtute, zirlaite leh nu leh pate, khawtlang hruaitute leh zirna kaihhnawiha thawktute chungah lawm thu a sawi a. Mizoram zirnain hma a sawn zel theih nana theih tawp chhuah chhunzawm zel turin zirna kaihhnawiha thawktu zawng zawngte a sawm bawk a ni.

Dr Vanlalthlana chuan HSSLC pass zawng zawngte chu zirna kawngpui pengthuam atanga kal darh a lo ngai dawn ta tih sawiin mi rilru puitlingte chu he hunah hian an danglamna a lo lang thin a ti a. Kawng zawh tur thlan kawngah te leh damchhunga hnathawh tur thlan kawngah te hun pawimawh a ni tih sawiin mahni kawng zawh tur theuhah hlawhtlinna paw chhuak thei turin tan lak a ngai hle dawn a ni a ti.

Minister chuan zirna tha a awm theih nan sawrkar leh mipuite lungrual taka kan tanho a ngai a. Kutbeng rimawi siam turin kut pahnih a chet a ngai ang hian zirna kawnga hlawhtlinna nei turin sawrkar leh mipuite kan tanrual a ngai a ni a ti a. Nu leh pate chu an fate zirna ngaihsak deuh deuh tur leh Mizoram tana mi chhenfakawm chher chhuak tura theih tawp chhuah turin a sawm a ni.