Aizawl Municipal Corporation (AMC) chuan Zirtawpni kalta khan Aizawl khawpui hmun thum a building sak chu dan phal bak a ni tiin an enfiah a, an thil hmuhdan hi report an thehluh hnuah a tul anga action lak zui a ni dawn a ni. AMC hian Khatla venga R.Lalawia building chu chhawng ruk thleng sak phalna a neih laiin chhawng kua thleng sak a ni tih an finfiah a. Lai House, Bungkawn ami chu chhawng nga sak phalna pek an nih laiin chhawng riat thleng an sa tih an hmu bawk a, Zampuimanga lungphun bula building Jeffrey Zampuimanga building chu feet 72 a sang sak phalsak anih laiin feet 79.3 a sang in sak a ni tih an finfiah bawk a. AMC Inspection team hian Building Regulation 2012 hmangin a tul angin action an la leh dawn a ni. Thil mak tak mai chu tun tuma AMC in dan phal baka in sa an enfiah te hi sawrkar building bakah mi hausa, ram rorel khawla dinhmun sang tak lo chelh tawh te in a ni hi a ni. Dan leh thupek zawm kawnga hma hruaitu tura ngaih ten dan zawm lova an bawhchhia hi a lungchhiatthlak a, an kaihhruai mipui te zahlohna a ni a tih theih hial. Tuna thil langchiang tak mai chu AMC hian mi hausa leh rethei, mi lian leh te a thliar lo tih tuna an thiltih hian a tilang a, mi hausa ah bul an tan chat mai hi a lawmawm hle. Kan hriattlan angin Aizawl khawpui hi ruahmanna mumal awm lova thang a ni a, tunhma chuan mahni remchanna lai laiah in kan sa mai a ni. Aizawl Development Authority a lo din atangin dan mumal deuh hman tan a ni a, tunah a takin AMC lamin an kalpui ta a. Plan city anih loh avang tak hian khuarel chhiatna chi hrang hrang lo thleng thin leimin, kangmei leh a dangte ah pawh kan tuar nasa zual a ni. Kan in leh lo din kawngah mithiamte thurawn kan ngaih pawimawh loh thin avangin kan tuar zual ni te pawhin a hriat. Engpawhnise dan zawm hi himna a nih bakah khua leh tui tha nihna a ni tih kan hriat thar leh a pawimawh. Khawvel ram hrang hrangah han thlir ila, ram nuam leh zalen ho chu dan leh thupek ngaih pawimawhna hmun a ni zel. Dictator rorelna te, sipai rorelna leh Communist in thuneihna an channa hmun ah chuan mipui nun a zalen lova, mahni kuta dan chelek anih thin avangin a hrehawm thin a ni. Chuvangin dan pawisak hi khua leh tui tha te tan kan 'duty' a ni tih hriain nasa lehzuala tan kan lak a pawimawh. AMC hian mipuite himna ber tur nia an hriat angin hma an la a, chuvangin huai taka an kal a, sut ngai a awm chuan huai taka an hmachhawn zel a ngai. Chuti ni lova an tawpsan mai emaw mi hausa leh thiltithei ten an palzut zel dawn anih chuan Aizawl khawpui hmalam hun chu a thim viau mai thei. A chak leh thiltithei apiang an dingchang anih chuan khawpui hrehawm takah a chhuak thei a ni. Chuvangin AMC hi huai tak leh chak takin kal zel sela, thiltha an tihna kawngah chuan an hnung ah mipui ten an zui a ni tih hre nawn leh teh se.