Mizoram Weightlifting Assocociation (MWA) buatsaiha huang hrang hranga Mizoram State Level Weightlifting Championships neih mekah Mizoram mi rit chawi chak 88 zet an inlan.

4th Youth (Boys & Girls), 13th Junior leh 18th Senior Men & Women Mizoram State Level Weightlifting Championships hi Ningani atang hian Weightlifting Academy, Ramhlun Sports Complex-ah MWA hian a huaihawt tan a ni. 

Tun tum inelnaah hian Mizoram atanga lifter tha, Army Sports Institute, Pune-a awm mek paruk inlante nen rit chawi chak mi 88 zet an inlan a. Hengte weightlifting club pasarih atang niin mipa 53 leh hmeichhia 35 an ni.

Indian Weightlifting Federation (IWLF) pawhin state level championship hi a ngai pawimawh a, he huanga inlan lo chu national championship-a an inlan pawh a phal lo va, hei vang hian lifter-te pawhin state huap inelnaa inlan ngei hi an tum thin. 

MWA buatsaih inelna hi Zirtawpni tlai hian Sports Minister Robert Romawia Royte hovin a kharna inkhawm hman tur a ni a. He hunah hian Commonwealth Youth Games-a gold medalist leh Asian Youth Weightlifting Championship-a palina, Lalruatfela chawimawina hun hman a ni bawk ang.

Bungzung tlangval hian July 12-16, 2023 chhunga Noida, Uttar Pradesh-a Commonwealth Youth Games neihah khan 81 kg huangah gold a la a. Noida-ah vek, July 28-August 5, 2023 chhunga Asian Youth Weightlifting Championships-ah 81 kg huangah tho palina dinhmun a hauh bawk.

Hemi hma, February thlaa 5th Khelo Youth Games 2023, Madhya Pradesh-ah khan 81 kg youth-ah silver medal a lo la tawh a. North East Games 2022-ah leh Sub Junior National 2023-ah gold medal a la tawh bawk a ni.

Thawhlehni khan Mizoramah hawin Lengpui Airport-ah MWA leh Bungzung VC bakah Aizawla Bungzung Zirlai Pawl leh welfare ten an hmuak a ni.

MWA hian hmachhawp lian tak neiin National Weightlifting Championship thlengtu tura tihfel tawh, Kerala an inhnuhdawh thut avangin IWLF nen indawrin thlen tumin hma an la mek a. Chief Minister Zoramthanga pawh hmu tawhin championship thleng tura an mamawhte thlenin a theih anga hma lakpui zel a tum.

India ram pum huap inelna thlen an tum chungchangah hian MWA General Secretary Malsawma Khiangte chuan, “Mizoten rit chawi chak tak tak kan nei tawh a. Jeremy-a, Lalchhanhimi leh Lalruatfela bakah mi dang pawh an awm nual a, heng mite hi Mizote hmai hmaah ngei an che vel lantir se tih kan duh a ni,” tiin ZALEN a lo hrilh tawh nghe nghe.