Aizawl: Nimin khan Hnam Chhantu Pawl buatsaihin an office, Upper Republic vengah Mizoram huntawng leh hma hun chungchang sawihona neih a ni. Sawihona hun kaihruaitu Hnam Chhantu Pawl President R.Ramhmangaiha chuan Mizoram huntawng mek chu mi thil chik miten ngun taka ngaihtuah a tul tawh nia an hriat avanga hetiang hun buatsaih an ni tih a sawi a. Central YMA President Lalbiakzuala, Lalrozara leh Lalthara IAS (rtd) te thusawi ngaihthlak hnuah zau takin sawihona neih a ni. Central YMA President Lalbiakzuala chuan Chakma pung chak lutuk chu a ngaimawhawm tak zet nia sawiin political party te chu seat 2 chan huam mai tur leh kohhran te pawh hma la lo ngam mai turin a duh tih a sawi a. Ramri vengtu BSF ten ramdangmi lut an awmlo tia Nil report an pe reng chu mak a tih thu sawiin Chakma pun chak chhan chu anmahni mi leh sa ‘Registrar of Births & Deaths’ an neih vang nia a hriat thu a sawi. Thusawitu dang Lalrozara chuan vote duh vanga Politician te hnamdang laka an inzuar nasa lutuk chuan ram a tibuai tih a sawi a. Ramdangmi lakah thikthu chhiat a ngai tih sawiin Mizoram Chakma te chu kum 2100 ah chuan nuai 35 an tling tawh dawn niin a sawi bawk. Lalthara IAS (rtd) pawhin paper present in Mizoram political party te chu an election manifesto ah Chakma chungchang chiang taka tarlang tura ngen nise, Legislative Assembly ah Chakma Autonomous District Council chu dan diklo a din anih avangin paih tura resolution siam nise tiin a rawt bawk.