An UCL match hnuhnung berah Napoli laka 4-1 zetin an tlawm a, Boss Jurgen Klopp-a leh a nau ten tlawm nawn an hlau. An mual Anfield-ah Ajax nen hun eng emaw chen 1-1 a an in draw hnuah an chak hram.

First half-a Salah leh Kudus-a te goal hmangin Liverpool leh Ajax te hi an in hnehtawk a, hun tawp hamrik ham hma minute 89-a Joel Matip-a head goal chuan Liverpool chhan him hramin tun season-a a vawi khat nan Champions League-ah an chak.

In khelh tan hmain Queen Elizabeth II thlah nan ngawi rengin hun reilote an ding a, inkhelh tan atang hun reiloteah Matip leh Thiago Alcantara te an langsar nghal a, Liverpool tan innghahna an tling. An dan pangaiin Reds defence lam pawhin ngai an awh chho leh tan niin a hriat. Goal thun kawngah Mane awm loh erawh an tur chho zel rih niin a lang. 

Ajax tan Daley Blind-a'n a hun tha tak neih goalah a chantir thei lo a, Napoli laka tlawm hlim Liverpool lamin tlawm nawn an hlau a, Anfield-ah theih tawp chhuahin an tang tih a hriat. Klopp-a pawl te hian Champions League Group A atanga knockout round lut turin a chhe berah pahnihna tal an hauh a ngai. 

Ball possession-ah Liverpool an chungnung hret a, 57% ball an chang. Goal shot erawh Ajax aiin an ngah zawk hle a, tum 24 zet shot neiin goal zawnah vawi 10 an pet theih laiin Ajax lamin shot vawi thum chiah neiin target phei chu tum 1 chiah a fuh a ni. 

Inkhelh tan atanga minute 17-naah Diogo Jota pass tha zet chu Mohamed Salah chuan goal-ah a chantir a, he goal hi Salah-a'n Liverpool tan Champions League-a goal 34 a thun tlinna chiah a ni bawk. Salah goal hi Mohammed Kudus-a'n minute 10 hnuah a rawn chhang let ve nghal a, hun eng emaw chen 1-1 niin an inhnehtawk mai dawn emaw tih hnuah Matip goal hmangin Liverpool an chak hram. 

Liverpool hian match hnih khel tawhin point 3 an nei a, khelh khata point 3 hlawh chhuak Napoli hnuai chiahah awmin Group A-ah pahnihna dinhmun an luah. Ajax lam pawh hian khelh hnihah point 3 neiin, Rangers chungah awmin pathumnaah an awm.

Team              P    GD    Pts
1 Napoli         1      3     3
2 Liverpool    2     -2     3
3 Ajax            2      3     3
4 Rangers     1     -4     0