August 3, 2023; MPCC president Lalsawta'n vawi anga kan hma lam hun thim leh khirh kan tawh a la awm ngai lo tih sawiin, BJP emaw NEDA hmanga BJP thawhpuitu te chu BJP atanga inthiarfihlim turin a ngen.

Vawiin a thuthar thehdarhtute a kawmna ah Lalsawta chuan, India rama hnam te zawk te sakhaw vawn leh hnam ziarang te nuaibo turin, BJP sawrkarin sakhaw zalenna leh hnam ziarang tana hlauhawm thlipui a tlehtir mek tih a sawi.

Uniform Civil Code hman tumna te a awm tih tarlang bawkin, thing, mau, ramhmun, lui leh nungcha tichereuva environment tichhe thei tur dan (Amendment Act, 2023) to Forest Conservation Act, 1980 pawh August ni 2, 2023 khan parliament in hnihin a pawm niin a sawi bawk.

Heng ruahmanna hian India ram inpumkhatna a tiderthawng thei a, he hun thim leh khirh kan tawn takah hian he thilpui do let turin Mizoram a political party zawng zawng te thawhho puiah a sawm tih tarlangin, Lalsawta chuan, "He thilpui tlehtirtu ber, BJP emaw, NEDA hmanga BJP thawhpuitu te pawh BJP atanga inthiarfihlim turin ka ngen bawk a, he thlipui hi political party te chauh tana do let hneh chi a nih dawn loh avangin, kohhran leh tlawmngai pawl zawng zawng te pawh ka sawm a, do letna dawhkan (platform) pawh dun turin ka ngen nghal a ni," a ti bawk.