ZALEN September 21, 2025: Mizoram sawrkar chuan Ainawn Venga sawrkar quarters-a chengte chu hun tiam ral hma ngeia chhuahsan turin a hriattir. 

September 18, 25-a thupek a chhuah angin Mizoram sawrkar hnuaia General Administration Department (GAD) chuan Ainawn Venga sawrkar quarters-a chengten an chhuahsan hun tur chu Order No.D.11014/3/2025-ESTT-GAD dt. 08.07.2025 hmangin a lo tar lang tawh.

Quarters luahtuten chenna tur in dang an zawnna tur hun tam zawk pek a tul nia a lan avangin Adviser to Chief Minister (Finance & Planning) hova local council leh NGO zawng zawngten August 6, 2025-a thu an rel angin Ainawn Venga sawrkar quarters luahtuten an quarters luah lai theuh an chhuahsan hun tur ruahman that leh a ni a. Hun tiam ral hma ngeia quarters chhuahsan turin a luahtu zawng zawngte hriattir an ni. 

Hetianga quarters te chhuak tura hriattir an nih chhan hi a him tawk tawh loh vang nia thu dawn a ni.

Mizoram sawrkara GAD-in ruahmanna a siam dan chuan Zone - I (Salvation Army Church bul)-a awmte October 31, 2025 hmaa chhuak tura tih an ni a, Zone -II (Ainawn Presbyterian Church hnung)-te pawh October 31, 2025-a chhuak tura tih an ni bawk.

Zone - III (FMGE&W Enclave road)-te November 30, 2025 hmaa chhuak tur a tih an ni a, Zone - IV (Jeremy Lalrinnunga in bul)-te October 31, 2025 hun tiamsak an ni a. Zone - V (Type III tlang)-te chu January 31, 2026 hun tiamsak ni bawkin Zone - VI (Shiv Mandir thlang)-te November 30, 2025 hun tiamsak an ni a. Zone - VII (Type - IV block)-te January 31, 2026 hun tiamsak an ni bawk.