Mizo Kristian te hunpui leh ngaihhlut hlawh Krismas leh kumthar lawmna chu tluang takin neih zawh a ni ta a, khawi hmunah mah buaina liantham chhuak a awm lo niin a lang a, a lawmawmin boruak muanawm a awm theih nana thawktu zawng zawng te an fakawm hle.

Kristian te tan chuan Isua Krista lo pian champha Krismas leh kumthar hi a hlu a, hlim taka lawm hi a phu a ni. Chutih rual erawh chuan kan hmuah leh lawm tum dan erawh kan thlak danglam a tul hle mai. Pathian leh mihring te inrem tawh lo inrem tura tlawm taka Lal Isua lo pian champha hi Kristian te tan chuan a hlu a, hlim taka Isua fakna hun tur a ni. Chutih lai chuan mi tam ber chuan a huau huau zawng leh ruihhlo nen hman kan tum tlat niin a lang a, a fuh lo hle.

Tun Krismas leh kumthar kan hman zawh tak pawh hi thalaite hian eng angin nge kan hman tih ngun takin chhuilet ila, mi tam tak chuan kumkhaw inchhirna atan leh hmingchhiat nan kan hmang mai ang em aw a tih theih. Hei hi a chhan chu ruihhlo leh mipat hmeichhiatnaah kan fimkhur tawk loh vang a ni.

Kan hunpui ah heti tak maia Police, Excise leh tlawmngai pawl te an duty a tul ta mai hian ngaihtuah a ti thui a, eng lai hi nge dik lo awm tih ngun taka kan enlet a tul hle. Krismas anih avanga ruih tum tlat mai te hi a finthlak loh a, kan lo rui anih pawhin midang te tana hnawksak lo zawnga awm kan zir thar a ngai hle a. Hei mai ni lovin midang te harsatna siam zawnga awm phei chu a finthlak loh lehzual hle a, hemi kawngah hian Mizo ten zirtur kan la ngah hle niin a lang.

Hetih laia sawrkar leh tlawmngai pawlte thu kan zawm loh langsar tak erawhchu kumhlui thlah zana khati tak mai a halpuah leh halmawi hal a tam kha a ni. Halmawi leh halpuah hi damlo te tan harsatna thlentu a ni a, chumai bakah sum tam tak luanralna a nih avang leh boruak a tih bawlhhlawh avangin kan hal loh mai hi a tha. Khati tak maia ngenna in zawm a hlawh lo khan ngaihtuah a ti thui hle a ni.

Hunpui kan hman zawh takah buaina leh harsatna liantham awm lova kan tlingtla thei hi a lawmawm a. Sawrkar inbuatsaihna a tha a, tlawmngai pawl hrang hrang YMA, JAC, VDP etc te thawmrimna a thlawn lo tih a lang chiang hle. Kumthar lamah pawh tun aia muanawm leh hlim taka hmang tura kan inbuatsaih chhunzawm zel a tha awm e.