Kan nghahlelh hunpui tluang takin kan hmang zo thei a, a lawmawm hle mai. Chhiatna lian tham awm loin kum thar kan chuang kai thei hi kan lawm tur a ni bawk ang. Tun tum Krismas leh Kumthar vuak vet thil thleng chhinchhiah tlak 3 a awm a, a then chu a vawi khatna tia sawi theih te a awm nual a ni.   Tourism Department huaihawtin Veng chei inelna siam a ni a, lawmman a that ang huin kan lawm a reh tan tawh emaw ni tel tura veng hming pe lut an tam lo hle a. Veng chei hrim hrim hi hunpui laia thil tih chi tak a ni a, a thei chuan ti chhunzawm zel se a that a beisei awm. Hetih lai hian mahni duhdan theuhin kan chei hlawm si a, Mizo tapchhak leh light khaimawi te hi khaikhin har tur tak a ni a, endiktute tan rilru put thiam a har khawpin a rinawm a ni. Veng inelna anga kan kalpui zel dawn a nih chuan thuken ‘theme’ hi siam ni tawh se tia rawtna nei te an awm bawk a ni.   Ruai theh nan khawpui lamah chuan plastic/poly-foam atanga thleng leh no siam hman kan intih hmuh lo tan niin a lang thei a. Hei hi kan chheh leh vel tichhe lo ‘environment friendly’ zawnga ruai theh kan duh tawh vang zawk niin a lang a, a lawmawm hle mai.Veng tam takah Mizo siam ngei mai kuhva kawr leh changela siam thleng kan hmang fur a, a daihlohna vengah thir thleng an hmang leh mai bawk a ni. Aizawl Municipal Corporation leh Kohhran hote thawhhona rah tha nasa takin a lang chhuak a, hmasawnna leh changkanna a kawk a chin zel chi a ni a. Kan chenna tichhe lo bungrua hman uar hi inzirtir ngai tak a ni a, he lama hma kan sawn hian entreprenuer te an kan phah a, hna a pun belh bakah a tha zawngin nghawng dang pawh a nei nual ang.   Halpuah leh a kaihhnawih khap a ni a, silai lemn a mu nei khap a ni bawk a ni. Chuti chung chuan ualau takin kan hala ualau takin kan zuar bawk a. Hemi bawhchhiat vanga mi man erawh uihum zah lek an ni leh thung si a, dan hmanga rorelna a lang lo titih der mai a, a pawi hle mai. Heng thil te hi kan khap dawn a nih chuan Sawrkar thuneitu lam hian tun ai nasaa tih tak takna an neih bakah tha an sen hnem a ngai dawn niin a lang.