Premier League nomawi inchuhna titi-ah hian, ‘Arsenal-in hma an la hruai chuan khua a la vawt tihna’ tih te, ‘Hunpui a la nih vang a nih chu,’ tih te, ‘Nipui a la hla a nih chu,’ tih te leh leh tawngkam dang pawh London club champion ‘loh leh khauh’ thin chungchang sawi a awm fo thin a. Mizote chauh kan ni lo, sapho hlei hleiin an uar.

Tun season kal mekah hunpuiah Arsenal-in hma an hruai lo tlat mai a, an dinhmun mek chu mi titi leh a tak ngeia an lo tawn tawh a thlir letin club legend Theirry Henry tilawmtu a ni zawk thung.

“Krismas-ah hma kan hruai chuan kan champion lo fo thin a, tuna hma kan hruai lo hi ka lawm hle a ni,” tiin Amazon Prime hnenah French forward hlui chuan a sawi.

Tun season kal meka nomawi inchuhna boruak nung takah hian a thlirlawkna an zawh chuan, “February-ah ka hrilh ang che u,” a ti a. “Hunpui liam hnuah ka ringlawk (predict) ve chauh thin,” a ti bawk.

Season kal mekah hian Premier League chung lam boruak a inthlak thut thut reng mai.

October kha chuan manager thar, Ange Postecoglou kaihhruaina hnuaiah Tottenham an thlawk sang khawp mai.

November a lo ni a, Manchester City chu ‘team hlauhawm loh’ tih theih tur hial khawpin an talbuai hman a, vawi ruk khelhah vawi khat chauh an chak.

Hun a liam leh hret a, hmahruaitu ni renrawn tawh, Arsenal-in Ningani zana West Ham an hneh lo va, Liverpool laka hma an hruaina an hloh an la let thei lo zui leh bawk.

Liverpool hian point 42 nen hma an hruai a; mahse, pangana Tottenham-in an thlauhna chu point ruk chauh a la ni thung.

Premier League chanchinah December 28-a a chung ber leh pangana point inthlauhna tun aia a zim tum chu 1992-92 leh 1996-97 season chauh kha a la ni a, tuna an dinhmun mek hian season tawp a hril pha ang em?

Hetih lai hian Pep Guardiola kaihhruai City chu a zawna Premier League nomawi vawi li chawi ngei tura rinkai ber an la ni mek tho.

Opta-in a chhut dan chuan tuna palina ni mek chauh hian champion theih tura rin an kaina chu 55.3% zet a la ni a. Liverpool chuan dawtin 26.7% an ni phak a. Season liam ta hun eng emaw ti laia point riat zeta san fal lai nei thei, Arsenal chu 15.4% an ni pha bawk.

Opta hian Aston Villa (2.2%) leh Tottenham (0.3%) te pawh champion theihna chhe tê ve ve an nei niin a ngai.

Nielsen’s Gracenote-in Euro Club Index a phuah khawm ve thungah chuan City leh Liverpool inkar a zim hle a, Guardiola-a kaihhruaite hian 42.2% chance an neih laiin Jurgen Klopp-a nauten 38.2% an nei ve thung.