Aizawl: Nimin khan Save Hunthar hmalakna in Hunthar Veng Local Council huamchhunga zu zawrhna pathum- Big Bang, Minions leh CK Wine Shop te chu khar sak an ni. Zalen thudawn danin Local Council, MHIP, MUP leh YMA te tangho in an siam Save Hunthar hian February 15, 2017 ral hma ngeiin an veng chhunga zu zawrhna pathum Big Bang, Minions leh CK Wine Shop te chu an vengchhunga zu zawrh an duh loh avangin khar turin an hriattir a, hun tiam chhung a an khar tak loh avangin an bungrua te thiarchhuak turin nimin khan vengchhung mipui an ko khawm ta a ni. Zalen palai thudawn danin chawhma dar 10 vel atangin mipuite an pungkhawm a, police tam tak Aizawl SP hoin an thawkchhuak bawk. Mipui pungkhawm an tam hnu hian magistrate in zu dawr neitute a ko a, mipui punkhawmna bula hmun remchangah khawtlang aiawh, magistrate, zu dawr neitute leh mi pawimawh dang te'n darkar khat chuang meeting an nei a. Chawhnu dar hnih velah boruak sosang awm loin an inrem fel thei ta niin Zalen chuan thu a dawng. Save Hunthar Chairman V.Lalrinmawia chuan mipui pungkhawm hmaah an inremna leh thutlukna sawiin heng wine shop pathum Big Bang, Minions leh CK Wine Shop hi nimin atang khan hawn an ni tawh dawn lo tih a sawi a, bungraw neih sa erawh an la dah rih thei ang a, dawr erawh hawn a ni tawh dawn lo niin a sawi. V. Lalrinmawia chuan an inremna a sawi zel danin bungrua te thehthang ral a nih hma chu an kawl rih ang a, an inthiar chhuak dawn anih chuan Save Hunthar hruaitu te hriatpuina chauhin an khawih che thei tawh dawn niin a sawi a. Chahbi chu Save Hunthar leh Excise & Narcotics lamin an kawl dawn niin a sawi bawk. Save Hunthar hruaitute chuan Zalen palai zawhna chhangin hriattirna an pek chu wine shop neituten an zawm mai loh avangin February 16, 2017 zingkar atangin hma an la tan a, zu dawr te hi kalh sakin lehkha te an tar a. February 17 Zirtawp zan phei kha chuan tlaivarin an veng niin Zalen palai an hrilh. Nimina Veng mipui pungkhawm hi thutlukna siam fel anih hnuah boruak sosang lutuk awm lovin an tindarh ta a ni.