CK Hyundai Independence Day 9 Ball Pool Championship 2024 final-ah Khatla South tlangval, Lalsangzela chuan tawnhriat nei tha leh langsar, Lalrina Renthlei lakah bul tan tha tawk lo mah se a tawpah dingchangin a champion.

Ningani chawhnua Millenium Centre chhuat zawl (atrium)-a Independence Day 9 Ball Pool Championship final khelhah hian Rina hian frame riat la hmasa zawk tura inelnaah frame hmasa pathum la zawnin bul a tan tha hle.

Zela’n beidawng lova beiin frame khat a lak veleh hnuah Rina insiam tha nghalin 4-1-in hma a hruai zui leh a. Frame an inlak chhawk leh zak zak hnuah 6-3 laiin Rina’n hma a hruai leh hman a; mahse, Zela’n huaisen taka bei zelin frame nga a la zawn zui a, 8-6-in champion nomawi a la ta a ni.

Thawhlehni atang khan MC atrium-ah Mizorama player tha zual 16 chauh inlanna championship khelh tan a ni a. Ningani chawhmaa semifinal-ah Rina hian T Laltanpuia, Upper Republic chu 7-1-a hnehin final a lut a. Zela hian PB Liansangzuala, Dawrpui chu 7-4-in a hneh ve bawk.

Championship hi quarterfinal chu frame ruk la hmasa zawk chak (race to 6)-a khelh niin semifinal chu race to 7-a khelh a thung a, final hi race to 8-a khelh a ni bawk.

Championship kharna leh lawmman semna hun hi Mizoram State Sports Council (MSSC) Sr. SPO Lalrinmawia’n khuallian niin a hmanpui a, main sporsor CK Hyundai atangin Marketing Manager Laltlanmawia Sailo-in a telpui bawk.

CK HYUNDAI Independence Day 9 Ball Pool Championship 2024 hi Mizoram Snooker & Billiards Association (MSBA) buatsaih niin co-sponsor te chu Mahindra Tractors, Cafe Desire, Mualhawih Picnic Spot, Pepperfry Bawngkawn, Marlboro te an ni a. Inkhel hi Explore Mizoram Youtube channel-ah live-a pek chhuah thin a ni.