Mizoram pool player ṭha 16 thlan chhuahte inlanna, CK Hyundai Independence Day 9 Ball Pool Championship 2024 chu Independence Day chawhnu hian Millennium Centre chhuat zawl (atrium)-ah khelh a ni dawn ta.

CK Hyundai Independence Day 9 Ball Pool Championship 2024 hi Thawhlehni atang khan khelh tan niin final khelh hma hian semi final khelh hmasak a ni ang a, chawhnuah final khelh zui a ni ang.

Nilainia quarterfinal khelhah Lalrina Renthlei, PB Liansangzuala, Lalsangzela leh T Laltanpuia te an inhawlh tlingin semifinal an lut.

Tuikhuahtlang tlangval, Lalrina hian Zonuntluanga, Electric veng chu 6-4-in a hneh a. Khatla Douth veng mi ve ve, Zela leh John Laldinsanga te an inkhelah Zela’n 6-1-in hnehna a chang bawk.

PB Sangzuala, Dawrpui chuan tun tum tournament-a Lunglei atanga player tha pahnih inlan zinga pakhat zawk, T Laltlansanga chu 6-2-in a hneh.

T Laltanpuia, Upper Republic Veng leh Lalchhandama, Dinthar te an inkhelah inhnehtawk taka frame inchhawk zak zakin frame ruk la hmasa chak ngaiah 5-5 thlengin an inhnehtawk a, a tawpah Tanpuia vannei zawkah tangin 6-5-a chakin a thiam pali zingah a inhlangkai ta a ni.

Semi final hi chawhma dar 11 atanga khel tanin frame sarih la hmasa zawk zawk chak tur an ni dawn a. Lalrina leh Tanpuia an inhmachhawn hmasa ang a. PB Sangzuala leh Zela an inhmachhawn zui ang.

Chawhnu dar 3:30-ah a chak zawk ve vein final an khel zui dawn a, final hi frame riat la hmasa zawk zawk chak tura khelh a ni ang.

CK HYUNDAI Independence Day 9 Ball Pool Championship 2024, hi Mizoram Snooker & Billiards Association (MSBA) buatsaih niin CK Hyundai chu main sponsor niin, Co-sponsor te chu Mahindra Tractors, Cafe Desire, Mualhawih Picnic Spot, Pepperfry Bawngkawn, Marlboro te an ni.

Championship hi Explore Mizoram Youtube channel-ah live a pekchhuah thin a ni a, a hmunah a thlawnin a en theih bawk.

CK Hyundai Independence Day 9 Ball Pool Championship 2024

Day 3 - August 15, 2024

1st Semi Finals : 11:00 PM

Lalrina Renthlei, Tuikhuahtlang vs T Lalṭanpuia, Upper Republic

2nd Semi Finals : 1:00 PM

PB Liansangzuala, Dawrpui vs Lalsangzela, Khatla South

Final : 3:30 PM