DOWNLOAD OUR APP

Read latest news on your phone
play-store app-store
app-store
I thinrim hmel a dur khup mai
titi ZALEN
Nov 17, 2019
ad
  • Zomawia
  • Vawi khat chu thiandun hi an inhnial a, an thu chu a inhmu ta lo zel a, pakhat zawk a dang a nal si a, pakhat zawkin hnial vak ngaihna a hre si lo, pakhat zawk hmel chu thinrimnain a lo khat ta hmuk mai, a hmel chu a lo dur ta, chu a thinrimna chu a hnuah chuan a puakkeh ta a, a thianpa inring lo lai chu a hem thlu ta tawp mai. A va pawi tak em!! Kutthlaktu zawk hian rilru fimin han inngaichang deuh sela chu hetiang hi a thleng tawp lo vang mawle. A thinrim hmel dur khup lai pawhin Pathian chu a hnenah a awm reng a ni tih a hria a, mahse, a thinrimna kal zel chu a hnuah a thawk ta mai a ni. Inngaihtuah hun a nei a, Heta tanga ka rilrua lo lut nghal a awm a, chu chu kaina leh Abela chungchang hi a ni. ‘Kaina chu a thin a ur a, a hmel a dur ta khup a.’ (Gen. 4:5).
  • Kaina leh Abela chungchang Genesis bung 4-na hi thu har tak a ni. Helai thu har tak hi chu keini ang chhui thiam chi a ni ve hauh lo vang le. Kaina thil hlanah Pathian a lawm lo va, Kaina a thin a rim a, a hmel-ah a lo lang ta a, chawplehchilh takin a lo dur ta khup mai le. Hetihlai tak hian a hnenah Pathianin thu a rawn sawi tih kan hmu a ni. Pathian chuan Kaina hnenah, “Engati nge i thin a ura, i hmel a dur tak le? Thil tha ti la, i hmel pawh a hlim ang chu. Thil tha i tih loh avangin sual chuan kawngkaah nghakhlel takin a chang reng che a ni; Mahse, i hneh tur a ni a sin.” Evi leh Adama chuan Pathian thu an awih loh avangin Eden huan atangin hnawh chhuah an lo ni tawh a, Pathian hnawhchhuah leh Pathian laka awm hranna chu thil rapthak tak a ni. Kaina thinrim lai tak hian Pathian khawngaihna leh zahngaihna lo lang hi hmuh hmaih chi a ni lo, Pathian chuan Kaina chu a bia a ni. “Thil tha ti la, i hlim ang chu” tiin. Mahse, Eden huan atanga sual hnathawh chuan Kaina chu a tiharh zawk tlat a ni. Pathian thu a awih duh lo va, mi dang pawh ni lo, a thisen zawmpui ngei mai a nau Abela chu a that ta tih a ni. Kan thinrim lai leh kan hmel a dur khup lai pawhin Pathian chuan min kal san ve ngai lo va, thinrimna sual lian tak mai chu kan thinlungah a len em avangin Pathian aw hre thei lo khawpin kan lo awm thin a ni zawk. Pathian chuan min um zui reng a, sual kawng kan zawh hi a hlau em em a ni tih a lang a ni. Pathian duh loh zawng kan lo tih pawhin, a ngilneihna leh a hmangaihna chuan mi sual nia ngaih pawh min ngaidam duh a, min um zui reng tih a tihlanna a ni. Pathian tel lo chuan chawlh?hahdamna zawng thin mah ila, mihring rilru hi chawlhna zawngin a vak ruai ruai thin a, a tuihal thin a ni. Kan za hian beram angin kan vak bo va; mahni kawng kawngah kan peng theuh a (Isaia 53:6). Thil mak deuh mai chu kan nunah hian Pathian tih ni awm takin pawnlawi takin kan nung ve a, a tak takah chuan Pathian hlauhna pawh kan nei lem lo hi a ni.
  • Pathian duh loh zawng tih chu sualin min chim reng thin: ‘Thil tha i tih loh avangin sual chuan kawngkaah nghakhlel takin a chang reng che a ni; Mahse, i hneh tur a ni a sin.” Helai thu hi mi thiamte hrilhfiah dan hrang hrang a awm chungin thil tha titu chu Pathianin a lawm a, a thu awih lote chu sualin a chang reng a, engtiklai pawhin a rawn per lut thei reng a, Pathian awm lohna hmun chu luah châkin a thlir ngawih ngawih tihna a ni ber e. Sakeiin a sa seh tur a chang run a, hun remchang a hmuh veleh a seh chat angin a teh khin a ni. Heng suala kan tlukluh hi Pathian chuan a phal lo va, amah hlat lo turin min duh a, sual chu hneh zawk turin min duh a ni.
  • Sual kawng zawh turin thlemtu chuan min hneh tumin engtiklai pawhin min châng reng a, tihthinrim che a tum reng a, tul lova kan thin a rim khan sual chu a lo zuang tawr tawr thin a sin. Sawt lo leh tul miah lova mi kan va itsik a, kan va er khan sual hnathawh a ni tih kan hriat a ngai. Rawngbawlnaah inngaihtlawmna tel lova kan duh dan kan tihlal fo chuan chu chu sualin a lo châng reng a sin. Hnathawhna hmuna thil fel lo tih hriat reng, kan it ngawih ngawih kha tuma hmuh loh emaw kan tih kha sual chuan seh chat tumin a lo chang reng che a. I inrin loh laiin a zuan thlu tawp mai ang che. Kan Pathian ang chhunga awm hi a him ber a ni. Tunlai khawvel tiin kan changkanzia hahipin kan sawi thin a, thalaite khawvelah chuan kum lama upa tawh phei chu eng ruai kan ni lo, kan hre phak tawh lo kan ti thin. Kan khawvel dinhmun zelah hian a changkang vek a, hmanlai thiamna leh finna te kha tunlai khawvelin a hai chhuah zawh loh hi tam tak a awm a ni. Tunlai sualna kan tih ang hi khawvel awm tirh atang khan sual thuk tak hi a lo intan daih tawh. Bible-a inthahna hmasa ber pawh hi Kaina leh Abela an ni. Unau dik tak, thisen inzawm an ni asin. Sualna hi chak takin a darh tih Genesis bung tir atang hian kan hmu a ni. D.F. Payne-a chuan, “Unau piang hmun, Pathian pakhat bia leh rinna hmun khata inhlan karah pawh in itsikna leh tualthahna hial a thleng thei a ni,” a ti. Kan unauin, kan nu leh pain, kan thianten min lo tithinrim a, kan hmel a lo dur ta viau a nih pawhin min hmangaihtu Pathian lam kan hawi vat rawh, kan hawi loh vaih chuan mihring ngaihtuahna thinlung kha sualin a rawn man chat mai dawn a ni. Kan thinrim leh mangan pawhin Pathian chuan min tlansan ngai lo tih chiang taka kan hriat a ngai. Zu hmuna kan awm lai pawhin Pathian chuan, “Ti suh, ti suh,” tiin kan thinlung kawng a kik det det reng a sin. Ani chuan min tlansan ngai lo va, nangmah kuangkuah nghakin a lo awm reng a ni. A hnenah intulut la, anin a ang chhungah chatuan atan a lo kuangkuah tawh ang che.
  • Duham avanga khua pawh hmu lo kan ram ringtu-ah hian tam tak kan awm a ni. Duham avangin mite chhiatna pawh kan pawisa lo va, mahni hmakhua chiah kan sial a, keimahni tana tha tur a nih phawt chuan mi dang chan chu lo chhe deuh mah se, pawi kan ti der lo a ni. Mahni kan inhmangaih luat avangin thian leh thian inkarah pawh inhmuhthiam lohna a thleng fo thin a, unau inkar-ah pawh in itsikna zung zamin thuk takin zung a kaih nghet tlat a, mahni kan indah pawimawh tuk a, thuneihna chan avanga midangte tana hnawksak hi engzat tak awm ang i maw aw?? Nihna sang tak chelh a, insum zo lo, mahni hote vin khur khur mai, insum zawh loh avanga mite chhiatna ti duh mai hi kawm nual thin. A pawi hle a ni. Hetiang mi hi belhtlak reng reng an awm lo va, an nunah ngaihsanna tur a awm lo va. Thil tha loin an nun a vaw let zawk thin a ni. Kan thinrim hmel hi a dur khup thin, Pathian neitu kan nih a ngai.

Latest News & Chhiar Hlawh