ZALEN February 13, 2026 : Mizoram Pradesh Congress Committee chuan vawiin lkhan Political Session ah mithar voter 22 lawmluhna an nei a, MPCC President Lal Thanzara chuan lawmthu a sawi a, Congress party a an awm chu lawmna tur a ni a. Chanchintha hril dodaltute thlawptu party MNF leh ZPM te ang an ni lo pawh lawmna tur a nih thu a sawi.

Thusawitu dang MPCC Vice President John Rotluangliana chuan, “Kum 2026 a rawn inher chhuak a, thu thara kan hriat hmasak chu ZPM MLA-in ZPM lo chuan CM Special package an dawng lovang tih a sawi a ni. A hnu lawkah an hotupa-in kan ti lo a rawn ti ve leh a, mu leh mal pawh an nei lo," a ti.

John Rotluangliana chuan, “Congress-in airport kan er chhuak a, MNF an rawn sawrkar a, Kamrula te nen sum siam nan an rawn hmang a, Airport cute an rawn sawi a. Tunah ZPM pawhin sum siam nan bawk an rawn hmang a, a bul ram hralh chungchangah a ram neituten vbch 70 an chan laiin, mantang eituten vbch 117 an lo ei ve a, a zahthlak hle a ni. ZPM sawrkar minister pakhat chuan CM nen chuan kan kut a fai a ti a, mi dang an kut a fai lo em ni tih hi kan zawhna a ni," a ti bawk.

Congress Vice President hian Chief Minister chu IAF hnena ram hralha atanga mantang ei ve nia a hriat thu sawiin, “Hemi chungchangah Congress chuan CBI ah FIR kan thehlut a, CM hian consent a pek ngei ngei a ngai a, pe lo a nih chuan ‘dekhega’ kan ti a, kan en liam mai mai dawn lo a ni. Chiang taka kan hriat thawi danin kan CM zahawm tak hian a chan tur chu vbch 14 a ni a, vbch 10 a chang ta zawk a, ‘Rangkachakin min pe rawh u,' a ti e an ti a, chu chu kum thara kan thu hriat hi a ni," a ti.

“MNF hi la sawrkar ta se, hmanah khan an hralh tawh dawn a lo ni zawk a. Kolkata-a ram an hralh pawh kha pawi tih aia pawi zawk a lo ni tawh. Kan MNF leh ZPM unau te hi zawlbuka e tang ve ve an ni chiang mai. Lengpui ram hralh chungchangah hian anmahni zawk zel hian kan sawi tur an rawn siam a ni," a ti bawk.