ZALEN January 29, 2026: MPCC chuan naktuk 30.01 2026 chawhma dar 11:00 hian Chanmari kawn atanga Vana Pa Hall thleng Lengpui Airport ram sira Indian Air Force hnena ram hralh vang te, MGNREGA hming leh a kalphung thlak avanga leh India ram hmun hrang hranga Christian te tawrhna avangin kawngzawh an huaihawt dawn a, Christian tawh phawt chu tawiawm turin an sawmin an ngen.

Congress Spokesperson Lalbiakzama chuan Lengpui ram Indian Air Force kuta hralh danah rorel lai ZPM leh MNF-te inkarah inpuhmawhna leh inhnialna a tam a. Chanchinbu leh Social Media atanga an thil lo hriatte chuan a barakhaih a, Party pahnihte kara inpuh tawnna leh thil chianglo awmte mipuite hnena puangzar turin sawrkar an phut a, thil diklo titu an awm a nih chuan chhuichhuah a, dan anga hrem ngei an phut tih a sawi.

MGNREGA thlakna VB G-RAM-G-a ni 100 aiah ni 125 chu a tha zawk tih ngaihdan a awm a, a lan dan mai ah chuan a that hmel zawk hle a ni. Mahse, MGNREGA-ah chuan ni 100 kuthnathawktute inhlawhna tur kha thutiam delhkilh (guarantee) a ni a, dan thar ah hian guarantee lam sawi rik a ni tawh lo.

MGNREGA-ah chuan hlawh hi central sawrkarin 100% a tum a, dan thar ah chuan N.E State ten 10% an tum dawn a, State lian te chuan 40% an tum thung ang. Mizoram ang sawrkar kal ve hram hram hian 10% a pe ve thei zel ang em? Nge Central Scheme tam tak 10% tum theih loh vanga zuzi ta ang hi hmabak a nih thu a sawi bawk.

MPCC Spokesperson chuan 2014-a BJP-te Central a an rawn sorkar atang khan India ramah Muslim leh Christian-te cheksawlhna leh nek chepna a rawn hluar chho a. Muslim-te phei chu a khat tawkin an vawhlum deuh reng ti ila a sual tam lo ang. Christian-te pawhin nekchepna leh cheksawlhna an tuarin an tawng tam ta hle a, kum 2014 atanga tun thleng hian a let sarih in a pung hman niin a sawi.

Lalbiakzama chuan, "Central BJP sawrkar hotute an ngawi tlat hian India ramah Minority- te tan dikna rorel ‘justice’ a awm tawh lo tih a tilang a. Tun ang zel anih hi chuan a punlun tawlh tawlh dawn tih hi a chiang a ni. State sawrkar hotute leh India Parliament a thu kan MP-te au chhuak ngamlo mahsela, keini Christian ram ti a inchhal thinte hian kan dikna chanvo hum tur hian aw kan chhuah ve a hun tawh ani lawm ni? A thu a kan la beihlet theih lai hian tan ila ang u," a ti.