ZALEN January 19, 2025 : Working Committee on Lengpui Airport chuan Indian Air Force (IAF) hnena Lengpui Airport hlan chungchang an bawhzui mek zel a, tun dinhmunah draft memorandum of agreement (MoA) an buatsaih mek nia thudawn a ni.

ZALEN thudawn danin Working Committee on Lengpui Airport hian cabinet meeting thuchhuak angin IAF hnena Lengpui Airport hlan chungchanga bawhzui ngaite leh buaipui ngai awmte hmalakna an kalpui mek zel a. An chairman, TBC Lalvenchhunga, MLA, Adviser to Chief Minister (Finance & Planning) chuan tun dinhmunah draft MoA an buatsaih mek tih ZALEN a hrilh.

Working committee hmasain state sawrkar hnena Lengpui Airport enkawl zui zel dan tur chungchanga report a thehluh chu October 16, 2024-a cabinet meeting-in a thuphungin a pawm a. Cabinet thutlukna bawhzui zel tur hian state sawrkar chuan working committee a din thar leh a ni.

State sawrkarin ‘Terms of Reference’ a siamsak angin he committee hian IAF hnena Lengpui Airport hlan dan tur chungchang a zir chiang ang a. IAF nen indawr zui zela draft MoA thlenga ruahmanna mumal tak siam tura tih an ni bawk a. Thla thum chhunga report thehluh tura tih a ni.

Hetianga enkawltu dang hnena Lengpui Airport hlan chungchangah hmalakna kalpui a nih mek lai hian Mizorama NGO hrang hrangte intelkhawmna, NGO Coordination Committee chuan August 9, 2023 khan thuchhuah siamin IAF kuta hlan an remtih loh thu an lo puang tawh.

NGOCC chuan thuchhuah siamin, “Mizoramin kan thil neih hlu em em leh neih chhun, Lengpui Airport hi IAF kuta hlan tumna a awm niin kan hria a, NGOCC chuan hlan a remti lo a ni,” an ti.

MNF leh Congress party-te pawhin IAF hnena airport hlan an duh loh thu an lo puang tawh bawk a. “Mizoram tana ro tling ZPM sawrkarin thehthang a tum dan hi mipui pawisawina nasa tak a nih dawn avangin kan pawmpui thei lo. A tawp thlenga dodal kan tum,” tiin an lo puang tawh bawk.