ZALEN November 17, 2024 : Tun hnaia neih cabinet meeting-in enkawltu dang hnena Lengpui Airport hlan chungchang lo bawhzui zel tura a tih, ‘Working Committee to Look into the Maintenance and Management of Lengpui Airport’ chuan Indian Air Force (IAF) an la dawr chhunzawm rih lo va. Hetihlai hian eptu party pahnih, MNF leh MPCC chuan IAF kuta airport hlan an duh lo tih thuchhuah siamin an lo tar lang tawh.

Chief Minister Lalduhoma chuan IAF kuta airport hlan chungchangah cabinet meeting (Oct. 16, 2024)-in thutlukna a la siam fel lo tih a lo sawi tawh a, a zirchiangtu working committee-in an zirchiang zel ang a, chu chu cabinet meeting-ah ngaihtuah leh a la nih tur thu a sawi.

Working committee hruaitute hnen atanga ZALEN thudawn danin, he cabinet meeting hnuah working committee leh IAF lamin indawrna an la neih chhunzawm rih lo a, hetianga inbiakna kalpui a la nih loh chhan hi working committee lam-ah terms of reference thenkhat siam that mek a awm vang niin thudawnna chuan a sawi.

Chief minister-in thuthar thehdarhtute a lo hrilh tawh danin IAF nen working committee hi vawi sarih an indawr tawh a, a hmunhmate pawh an en a. Committee hian report an thehlut a, chu chu cabinet meeting-ah ngaihtuah a ni.

Chief minister chuan IAF kuta hlan a nih chuan Mizoram sawrkarah a man an pek tur thu sawiin, “Ram an mamawh belh a nih pawhin sawrkarin ram tur a laksak ang a, zangnadawmna chu anmahniin pek vek an inhuam a. IAF kutah lo hlan ta pawh ni ila, a runway bak an chang dawn loa,

terminal chu kan kut tur tho a la ni,” a ti a, terminal chauhah chuan sawrkarin hlawkna a tel ve theih tur thu a sawi.

Lalduhoma chuan Lengpui Airport enkawlna senso chu a san avangin sawrkarin a chawi belh nasat bakah a tihchangtlunna tur a ngaih tam thu a sawi bawk.

Hetihlai hian Mizorama eptu party pahnih, MNF leh Mizoram Pradesh Congress Committee (MPCC) chuan IAF kuta airport hlan an duh lo tih an lo puang tawh.

MNF party chuan Mizoram tana ro tling ZPM sawrkarin thehthang a tum dan chu mipui pawisawina nasa tak a nih dawn avangin an pawm theih loh thu leh a tawp thlenga dodal an tum thu an lo puang tawh a. MPCC pawhin IAF kutah hlan lo hram turin sawrkar an ngen a, hlan chu mipui pawi sawina a tlin hial tur thu an lo puang tawh bawk.