ZALEN February 4, 2026: Congress chuan tunhnaia Lengpui Airport bula Indian Air Force in ram diklo taka an lei leh Compensation tam uchuak tak pek a ni te, mantang ei an awm ni a lang chungchangah hian ZPM Val Upa Council te inrawlh a, chhui chianga action la turin an phut.

ZPM hian kum 2023 inthlan hma khan thutiam tamtak an nei, chung zingah chuan Val Upa Council thuneihna leh an function chungchang a tel a, ZPM Constitution 4:4 ah pawh a inziak a ni. ZPM hian an sawrkar hma khan an sawi pawimawh in, sawrkar khalh ngiltu tur, zilh ngai zilh a, ban thei hial tura thuneihna pek niin an sawi a ni.

Mahse tuna an thlen chinah hian an hnuhma leh inrawlhna hriat tur a awm lova, ZPM sawrkar hnuaia Lengpui ram, dan kalkana IAF hnena hralh a ni leh sum tam tak mantangah a kal ral chungchangah pawh hian Val Upa Council chu an awm nge awm lo tih hriat loh khawpin a reh a ni, an ti.

Congress chuan he ram inleina chungchangah hian MNF sawrkar kalta khan ram inlei phalna an pe a, ZPM sawrkarah hralh a ni thung. An ni party pahnih hi an fihlim lova, mahse pawisa dawngtu zawk chu an awm tih Hriata Chhangte chuan Youtube ah a sawi chiang a, kut an thlak ve ve avangin inpuh tur chuang bik an awm lova, ram leh hnam pawi nasa takin an khawih a ni tih inpawmin Mizoram mipui hnenah ngaihdam dil se, an tihsual hi siamtha se an duh bawk.

Congress chuan Val Upa Council member te hi an sawi ang in mi zahawm tak tak, mi dik leh eirukna a fihlim te awmna niin a lang a, chutiang a nih avang chuan he Lengpui ram inlei dan diklo leh eirukna liantham tak awm anga langah hian hma an la lo anih chuan an zahawmna nasa takin a tlahniamin an member te pawh in mipui rin an hlawh lo thei a ni. Chuvang chuan thu an nei tak tak anih chuan he thilah hian kut kuangkuah mai lovin, chhui chiang se, ZPM Ministry an lo inrawlh ngei anih chuan hma la in, mantang dawng an awm chuan Chief Minister pawh nise ban theihna power an neih angin ban se tih chu an ngenna a nih thu an sawi.