International Criminal Court (ICC) chuan Russian President Vladimir Putin-a manna tur thupek a chhuah a, hei hi US President Joe Biden pawhin tha a tih thu a sawi.

ICC hian President Putin-a hi Ukraine-a rûn mekah indonaah dan a bawhchhia (war crime) niin a puh a, hei hi President Biden-a pawhin a hmaa a lo sawi tawh thin a ni.

Putin-a an puhna langsar ber hi Moscow-in kum 2022-a a rûn atangin Ukraine naupangte chu Russia-ah tam tak a thiar lut tih a ni.

Moscow chuan he puhna hi a dik loh thu leh warrant tihchhuah chu ‘tih awm ang loh tak’ a nih thu a sawi.

Putin-a hi man a nih tak tak pawh a rinawm loh va, ICC hian sorkar puihna lo chuan mi rinhlelhte man theihna a nei lo.

Russia hi ICC member a ni lo bawk a, a ram chhungah chet vak theihna a nei lo tihna a ni.

Hetih lai hian he thupek hian Putin-a hi kawng hrang hrangin a chetvel a tibuai dawn a, a langsar berah chuan ram danga a zin a khirh dawn a. Court-a member ni ram 123 zinga khawiah pawh zin chhuak sela man a ni thei ang.

Putin-a hi president zinga ICC-in manna tur thupek a chhuah pathumna chauh a la ni.

President Biden-a chuan court-in hetiang thupek a chhuah hi a lawmawm thu leh warrant ‘na taka nawrna’ a nih thu a sawi.

United Nations pawhin kar tir lamah khan Moscow hian an ram thunun chinah Ukrainian naupangte chu tihluihnain hmun dangah a sawn ngei tih fiah a nih thu leh hei hi dan bawhchhiatna a nih thu a sawi.

Zirtawpnia ICC-in thu a chhuahah Putin-a hi mi dang nen thawkhovin dan an bawhchhia niin a tar lang a. President a nihnaa a thuneihna chu naupangte sawn tur dan nan a hmang lo niin an puh bawk.

Russia-a Commissioner for Children’s Rights Maria Lvova-Belova pawhin Putin-a thubuaiah bawk hian ICC-in a man duh (wanted) zingah a tel.

Kremlin thupuangtu, Dmitry Peskov chuan court thutlukna chu ‘engmah lo leh palzam tur’ a nih thu a sawi a, Russian President Dmitry Medvedev pawh khan ICC warrant hi toilet paper nen a tehkhin mai mai tih a sawi bawk.

Russia-a eptute chuan ICC thupek hi lawmawm an tih thu an sawi a. Lung ina dah mek, Alexei Navalny-a thawhpui, Ivan Zhdanov chuan ‘rahbi chhinchhiahtlak’ a nih thu leh a pawimawh hle tih Twitter-ah a tar lang.

Ukrainian President Volodymyr Zelensky pawhin Khan-a leh ICC-in hetianga ‘an ram hmelma’ laka thu a titlu hi lawmawm a tih thu a sawi bawk.

Putin-a thubuai chu...

Putin-a manna tur thupek a nih chungchangah hian ICC prosecutor Karim Khan chuan thupek hi ‘forensic hmanga finfiahna, chik taka zirna leh thil thleng a taka hmu ngeitu pahnihte thu’ behchhana tihchhuah a nih thu a sawi.

Court hian a tirah chuan arrest warrant-te hi vantlang hriatah a puang lo va; mahse, dan bawhchhiatna a thlen zui loh nan a puangzar zui ta nia sawi a ni.

“Naupangte hi indonaah a remchan ang anga sawp theih an ni lo va, an awm hmun pawh sawnsak theih an ni lo,” tiin Khan chuan BBC hnenah a sawi.

“Hetiang dan bawhchhiatnaah hi chuan tumahin dan hre mi pawh an mamawh lo va, tute pawhin mihring leh mihring intih dan tur a ni lo tih an hria,” a ti.

Khan-a hian tumahin kum 1990 chhova Croatia, Bosnia leh Kosovo-a Serbian hruaitu, Slobodan Milosevic-a chungthu ngaihtuah a ni leh a tawpah The Hague-in hremna a pek thu kha an hre chang tawh lo niin a sawi.

“Chhun engah pawi i khawih a, zanah hahdam takin i mu a ni thei a; mahse, thil thleng tawh en rawh,” tiin tun hmaa dan bawhchhia chunga thil kalpui dan a sawi.