Khawvela khualzin phur chi lawng lian ber ber chu methane a tihchhuah nasat dawn avanga sawiselna karah Miami, Florida atangin a vawi khat nan a zin chhuak ta.

Metre 365 (ft 1,197) zeta sei, Icon of the Seas hi chhawng 20 zet niin passenger 7,600 thleng a phur thei a, Royal Caribbean Group ta a ni.

Lawng lian hian a zin chhuah vawi khatnaah hian thliarkar hrang hrang tlawhin ni sarih a thang dawn a ni.

Khualrel humhim duhtu (environmentalist) tam tak chuan liquefied natural gas hmanga tihkal lawng lian hian boruak hlauhawm tak, methane a tihchhuah nasat dawn avangin an sawisel.

“Kawng dik lo lama rahbi penna a ni,” tiin International Council on Clean Transportation (ICCT) Marine Programme Director Bryan Comer chuan a sawi niin Reuters news agency chuan a tar lang.

“Tuipuia zin nana LNG hman hi marine gas oil aiin greenhouse gas pek chhuahnaah 120% zetin a nasa zawk niin kan hria,” a ti.

Kar hmasa tir lamah khan ICCT hian an report tichhuakin LNG hmang lawngte hian tuna kalphung (regulation) an neih aia tam fe methane an pe chhuak niin an tar lang.

LNG hi tuipuia zin nana an hman thin (marine fuel) pangngai, fuel oil aiin a kang na zawk a; mahse, a put a hlauhawm zawk thung.

Greenhouse gas chak tak, methane hi boruak (atmosphere)-ah hian kum 20 chuang liam ta chhungin carbon dioxide aiin lumna a let 80-in a kawl rei zawk a. Tihchhuah tlem chu khawvel lum zel tur tihmuanna chi khat a ni.

Royal Caribbean thupuangtu chuan chanchinbua sawiselna neih neuh awm chu chhangin Icon of the Seas hi International Maritime Organization-in tun lai lawng dangte tana kaihhruaina him chin a siam aiin 24%-in boruak tihchhiat kawngah a him zawk niin a sawi ve thung a. An company hian kum 2035-ah chuan boruak tichhe thei engmah pe chhuak lo lawng hman hman an tum bawk tih a sawi.

Ningani khan Argentina tana World Cup nomawi latu, Inter Miami tana khel mek, Lionel Messi chu lawng hming phuahna inkhawmah a tel nghe nghe.

Icon of the Seas sak nan hian $ tluklehdingawn 2 zet hman niin tuichenna pasarih, tuia tawlhna (waterslide) paruk, thingpui dawr, bar leh lounge 40 chuang a awm bawk.