Aizawl: Nimin khan Aijal Club-ah ni hnih awh India khawchhak leh hmarchhak biala IGNOU Regional Director ten intawh khawm an nei a, Finance Minister Lalsawta chuan he hun hi a hmanpui. Hawnna inkhawmah hian thu sawiin Finance Minister Lalsawta chuan, “Tunlai hunah zirna senso a san avangin mi tam tak harsatna a thlen a. Hetih laia IGNOU in kan kawtkaia mipuite zirna an buatsaih hi a lawmawm a, mipuiten chhawr tangkai se ka duh hle a ni,” a ti.  Lalsawta chuan IGNOU tangkaina sawiin amah ngei pawh Master Degree leh Certificate Programme zir mek a nih thu leh Post-Graduate Diploma in Cyber Law pawh a zir chhuah tawh thu a sawi bawk. Khual zahawm Prof. Sambasiva Rao, Vice Chancellor Mizoram University chuan IGNOU system chu a that em avangin open university ni mahse, university dangte pawhin a pass chhuakte enhranna an neih loh thu a sawi. Mizo zirlaite tana job-based course tam zawk IGNOU-in a chhawp chhuak chu  lawmawm a tih thu leh Mizo zirlaite chu state chhung chauha lehkha zir leh hna zawn tum lo va, pawn lama chhuak tam turin a duh thu a sawi a ni. Indira Gandhi National Open University hnuaia North-East leh East Zone Regional Director Meeting-ah hian Orissa, West Bengal, Assam, Arunchal Pradesh, Nagaland, Mizoram, Tripura, Sikkim, Manipur, Meghalaya atangin Regional Director te an lo tel a ni. Regional Director khawmpui neih zawh hian Press mite kawmin IGNOU Vice Chancellor Prof. SB Arora chuan IGNOU-in programme 240 an kalpui mekah Mizoramah chuan programme 67 an kalpui niin a sawi a. IGNOU chu zirlaite hnena zirna hmanrua (study materials) a thlawna pe theitu a nih avangin zirlaiten hmang tangkai se a duh tih a sawi bawk. Zirlaiten study materials an dawn that loh chungchang zawhna chhangin IGNOU hotute chuan, “Tun hmaa study materials te ware house a dah thin chu tih dan thar hmanga dakah thawn a nih tak avangin zirlaite hnena pekchhawn kawngah harsatna kan tawk a. Hei bakah internet that tawkloh avangin harsatna a awm bawk avangin zirlai ten common service centre hmang tangkai se kan duh a ni,” a ti bawk. IGNOU hian tun dinhmunah (July 2017 - January 2018) zirlai nuai 10.42 an nei mek a ni.&&&&