ZALEN January 5, 2025: India rama media lam zirna lian zinga mi Indian Institute of Mass Communication (IIMC) chuan kumin January 1, 2025 atangin Ph. D zirna an hawng thar. 

Aizawl-a North East Regional Campus awm mek, Ministry of Information & Broadcasting hnuaia din, IIMC ah hian a tirah chuan Post Graduate Diploma kum khat course hrang hrang a awm thin a. Tunhnaiah University-a leh chhoh mek niin 'Deemed to be University' ah dah a ni a. Nikum atang khan Masters degree kum hnih course hrang hrang dah tan a ni a. Tihchangtlun zelna turin kumin January ni 1 khan Ph.D zirna hi full time leh part-time-a zir theih turin hawn a ni leh ta a ni. 

IIMC Vice Chancellor Dr. Pragya Paliwal Gaur chuan IIMC-a Ph.D zir theih a ni ta chu research lama India ram a than zel theihna tura hmalakna pawimawh tak a nih thu a sawi a. Ram mipuite tana tangkai tur leh ram ti hmasawn thei tur research project neih tam a tul thu a sawi bawk a ni. IIMC-a Ph.D zir tur hian tun thla chhung hian dilna a thehluh theih a. UGC-NET qualified te tan interview hmachhawn chauh a ngai ang a, a nei lo tan chuan written exam hmachhawn a ngai thung dawn a ni. 

IIMC hi Delhi-a a hmunpui bakah India ramchhungah regional campus dang 5 a awm mek a. Aizawla Mizoram University campus-ah North East Regional Campus a awm a. Aizawl campus bikah hian Post Graduate Diploma in English Journalism zirlai 20 bakah Master in New Media Communications zirlai 14 an awm mek a, an vaiin Mizoram pawn atanga lo kal vek an ni.