Aizawl: Nimin khan Mizo Zirlai Pawl (MZP) bultumin Mizoram hmun hrang hrangah hnamdang dan lova khawsa (Inner Line Permit nei lo) leh Mizoram state chhunga dan lo leh permit nei lova sumdawng dapchhuah hnatlang neih a ni a, ILP nei lo mi 150 chuang leh dan lova sumdawng mi 20 chuang hmuhchhuah niin thuneitute kutah hlan nghal an ni. Thudawn danin nimina an man te hi permit neilo an nih bakah anmahni leh anmahni lo in-sponsor te leh hnam dang vekin an lo sponsor te an ni. MZP chuan thuchhuah siamin ILPnei lo an dapchhuah kawngah dan lova Mizorama awmte Mizoin an thlavang an lo hauh thin chu pawi an ti hle tih sawiin tunhnuah chuan an thlavang lo hauh tawh lo turin an ngen tih an sawi a. ILP chu a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute an ngen tih an sawi bawk. MZP chuan Mizoram chhung a dan lova hnamdang awm Inner Line Permit nei lo te, hnam dang sumdawngte leh Mizo hming hawh a sumdawngte dapchhuakin a tul angin hma a la chhunzawm zel dawn tih sawiin tawiawm zel turin Mizo mipuite an sawm bawk.