Aizawl: Zalen zirchian danin sorkarin chhiah lak dan thar a siam Goods & Services Tax (GST) registration tih danah hnam tana him lo a awm thei nia hriat a ni. Mizoram GST Act, 2017-in a phut dan chuan hnam dang sumdawng duh an awm chuan kum 2 dam Inner Line Permit (ILP) an nei ngei ngei tur a ni tih a ni a, hei hi Central GST Act, 2017 hnuai in-register turte tan erawh a tul ve lem lo. Hetih lai hian GST registration ti turte dilna hi internet kaltlanga tih a ni a, portal-ah a hlawma lutin Mizoram sorkar leh Central sorkarin registration a tihsak turte hi khawlin a lo sem mai thin a ni. Central lam tih tur leh State sorkar tihtur chu khawl hmanga thliar hrana pek chhuah a nih avangin ILP nena registration tih ngai hnam dang sumdawng in dilna a thehluh kha Central lam buaipui turah a kal palh a nih chuan ILP tel lovin awlsam takin GST registration a ti thei dawn a ni. He GST registration kalpui dan hi Inner Line Permit nei state te tan a him tawk ta lo a ni. Hemi bakah hian GST-a registration dilna reng reng hi ni 3 chhunga tihfelsak an nih loh chuan khawlin amahin automatic-in registration a lo ti dawn a. Hei hi a thleng a nih chuan ILP neih leh neih loh lam check fel na hun a awm lo anga, ILP nei kher lo hnamdang sumdawng pawhin GST Registration a nei thei dawn a ni. Thudawn danin ILP nei state te tana GST Registration kalphung siam that hi thil buaithlak tak a ni a. Central lama GST Council lam chu Mizoram sorkarin a zu dawr te a nih lemloh chuan central kalphung duansa siam that hi thil theih loh tluk a ni. Hetih lai hian Central GST Act, 2017 hmanga GST Registration titu tur lam hi Aizawl ah an rawn inbun mek nia hriat a ni.